Dena prest IX. Atlantikaldirako
Aurtengo jaialdia hilaren 15etik 18ra izango da, herriko hainbat gunetan. Berezitasun nagusia kaleak eta ohiko itxura berreskuratzea izango da.
Iker Tolosa, Maite Gartzia, Aizpea Otaegi, Maria Jose Telleria eta Goiatz Dutti Atlantikaldiaren aurkezpenean. Dena prest dago jada Atlantikaldiaren IX. edizioari ekiteko, eta gaur goizean aurkeztu dute Donostiako Aquariumean jaialdiaren egitaraua osotasunean Aizpea Otaegi alkateak, Maite Gartzia Kultura zinegotziak, Maria Jose Telleria Gipuzkoako Foru Aldundiko Kultura zuzendari nagusiak, Iker Tolosa Atlantikaldiaren zuzendariak eta Goiatz Dutto Moonshine Wagon taldeko kideak.
2014tik etenik gabe antolatu den jaialdia hilaren 15etik 18ra ospatuko da, eta azken bi edizio egokituen ondoren, kaleak eta ohiko itxura berreskuratzea izango da aurtengo berezitasun nagusia. ‘Itsas kodeak’ lelopean, Atlantikaldiak nortasun propioa izango duten lau gune nagusi izango dituela iragarri du Maite Gartziak. Lehendakari Agirre plazako ‘Itsasargi Nagusian’ oholtza nagusia egongo da; Panierren kokatuko den ‘Kalekaia’ eremuan puntako artista urbanoen txokoa ezarriko da; ‘Herriko plaza’ eskaintza intimoago baterako tokia izango da; eta Foru plazako ‘Herrixka’ eremuan herritarren parte hartzea sustatuko duten sorkuntza tailerrak, gastronomia ekimenak eta musika emanaldi gehiago topatu ahal izango dira.
2014an jaialdiaren lehen edizioa egin zenetik, Aizpea Otaegik argi utzi du Atlantikaldia zer izan den: “Atlantikaldiak leiho bat izan nahi du mundura eta ate bat munduarentzako. Balioan jarri nahi dugu munduan eta gure herrian dagoen aniztasuna eta aniztasunaren ondorioz ezinbestekoa den elkarbizitza hori balioan jarri nahi duen jaialdia dela. Horregatik da horren garrantzitsua bertako eta bisitari ditugun artisten arteko elkarlana. Fokua jarri dugu ‘Itsas Elkarrizketetan’ eta artisten arteko lankidetzan”.
Zer dira ‘Itsas Elkarrizketak’?
‘Itsas Elkarrizketak’ egitasmoaren bidez, Atlantikaldiak nazioarteko eta bertako sortzaileak elkarlanean jarri nahi dituela azaldu du Iker Tolosa zuzendariak. Hori dela eta, “inoiz taularatu gabeko proposamenak eskainiko” dituztela aurreratu du Tolosak, eta gaur iragarri dituzte aurtengo kolaborazioak: Tanxugueiras eta Neomak; Kolinga, Iker Lauroba eta Leire Letu; Las Karamba eta Amaia Elizaran; Les Amazones D’Afrique eta Tony Viser; eta España Circo Este eta Moonshine Wagon. Artista horiek guztiak estreinakoz elkartuko dira euren ibilbideetan Atlantikaldiko oholtzetan.
Jaialdiak irauten duen denboran, 70-75 jarduera egongo dira publikoaren eskura aipatutako lau gune nagusietan zein herriko beste hainbat puntutan, musikaz harago ere doazenak. Ekintza eta emanaldi guztien ordutegiak eta xehetasunak Atlantikaldiaren webgunean kontsulta daitezke. Horrez gain, jarduera batzuetan parte hartzeko aurrez izena eman behar dela azaldu du Tolosak. Izen-emate horiek Atlantikaldiaren webgunean egin beharko dira.
Bukatzeko, Otaegik eskerrak eman nahi izan dizkie jaialdia antolatzeko elkarlanean “ezinbesteko zutabe” izan diren eragile eta kolaboratzaile guztiei.
