EH Bildu: 'Correos eta Ziriza arteko proiektua zentzugabea da'
Udal gobernuak errepide bat eraiki nahi du bien arteko orubean. Behin-behineko aparkalekua Euskadi etorbidearekin lotu nahi dute.
Pasaiako EH Bilduren udal taldeak irmoki salatu du Correos eta Zirizaren artean dagoen oruberako udalak aurreikusi duen proiektua. PSE-EE eta EAJren udal gobernuak errepide bat eraikiko du aipatu eremuan, Adinberriko obrak direla eta, bertan egingo den behin-behineko aparkalekua Euskadi etorbidearekin lotzeko.
Koalizio abertzalearen arabera, proiektua zentzugabea da: “Azokaren atzeko orubeak errepide bidezko sarbide naturala du, Aduana kaletik”. Ondorioz, zirkulazioari dagokionean, Euskadi Etorbidean trafiko kaosa sortuko duela iritzi diote, eta hurrengo galdera luzatu diete PSE-EE eta EAJri: “Zer interesi erantzuten dio proiektu horrek? Herrikoei edo Portu Agintaritzarenei? Norentzat gobernatzen du Pasaiako alkateak?”
EH Bilduk proiektu horrek mugikortasun sailaren txostenetan balorazio negatiboak dituela ohartarazi du. Ondorio gisara, koalizioak udal gobernuari berehala proiektua bertan behera utz dezala eskatu dio.
