[Galeria] Festa egiteko, festan egon behar da
Gaur ere seigarren izan da Hibaikako trainerua Kontxan. Sailkapen nagusian seigarren portua eskuratu dute oreretarrek.
Ohorez defendatu du Hibaikak Kontxarako sailkapen estropadan lortutako plaza. Joan den igandeko lehen jardunaldian bezala, gaur ere seigarren izan dira. Salbuespen batekin: lehen jardunaldian urrun samar izan zituzten aurkariak Madalen ontzikoek. Gaur hurbilago izan dituzte, eta adibidez, Hondarribitik bi ehunekora iritsi dira helmugara. Sailkapen nagusian ere seigarren izan dira Inge Ugartek gidatutakoak. Lehiakor jardun dute bi jardunaldietan. Ez dira paseora atera. Arraunaren festan parte hartu dute, ohorez lortu dutelako bertan egotea.
Emakumeen Kontxa Oriok irabazi du, Arraun Lagunak-en aurretik. Ondoren sailkatu dira Tolosaldea, Donostiarra eta Hondarribia. Horiexek izango dituzte aurkari 2023ko sasoian EuskoTren Ligan. Beraz, eta jada sasoia bukatuta, ziurrenik jada datorren urtekoei begira jarrita daudela Errenteria-Oreretako arraun elkarteko kideak, baita zaleak ere: gaur ere ez dute hutsik egin Hibaikaren jarraitzaileek, eta Kontxan izan dira berez bero zegoen egunari tenperatuta igotzeko.
Gaurko puntu iluna, beharbada, traineruaren lehorreratzean gertatu da. Arauengatik-edo, arraunlariek ez dute Madalen trainerua Aquariumeko arrapala nagusitik ateratzeko aukerarik izan. Hau da, Kontxako unerik preziatuenetako bat, Hibaikaren zaleen eta beste zale guztien aitortza jasotzeko une hori, ezin izan dute bizi herriko emakumeek.
Emakumeen sailkapen osoa ikusteko, klik egin hemen.
