Donibane eta Antxoko ludotekak, berritasunekin
Ostegunetik aurrera eman ahalko da izena udal ludoteketan. Donibanekoek berrituta topatuko dute egoitza, eta Antxokoek, kokaleku berrian.
Pasai Antxoko ludotekaren egoitza zaharra, azoka eraikinaren barruan 
Datorren ikasturterako Pasaiako ludoteketan izena emateko epea ostegunean (hilak 15) zabalduko dute, eta hala mantenduko da hilaren azkenera arte. Trintxerpe-San Pedro, Antxo eta Donibaneko guneen artean hautatu ahalko da, ohiko legez, eta azken bi barruti horietan aldaketak egon dira.
Kantauri Ludiko Elkarteak kudeaturiko egoitzen eskaintza 4 eta 12 urte bitarteko gaztetxoentzat dago zuzenduta. Arratsaldero, eskola ordutegitik kanpo, aisiaz eta euskaraz gozatzeko egitasmo gisa aurkeztu dute atzean bide luzea duen ludotekena.
Bazkideek 57 euro pasatxoko kuota ordaindu beharko dute ikasturteko (ikasturte erdiko aukera ere badago). Inskribatzeko asmoa duenak posta elektroniko bidez edo telefonoz egin dezake hori, eta zalantzatan daudenei aukera eskainiko diete egoitzak bertatik bertara ezagutzeko, aurretik arduradunekin harremanetan jarrita.
Donibane eta Antxon, berritasunak
Sanjuandar gazteek berrituriko espazioa estreinatu ahalko dute datozen asteotan. “Askotariko ekintzak burutu ahal izateko espazio multifuntzionalarekin eta altzari berriekin”, aurreratu dute.
Antxokoari dagokionez, gaur arte erabili izan den lokala berriki eraitsitako azokan zegoen, eta beraz, kokaleku berria ezarri dute Eskalantegi kaleko 45 zenbakian. Oraindik obretan dago espazio hori, eta beraz, behin-behinean Anunciata ikastetxean elkartuko dira barruti horretako txikiak.
Harremanetarako
Ludoteketako egoitza bakoitzak harremanetarako bide propioak ditu. Horra hor informazio orokorra:
- Trintxerpe-San Pedroko Udal Ludoteka: Helbidea: Espinosa de los Monteros z/g. Posta elektroniko bidez mezua idazteko, egin klik hemen. Telefono zenbakia: 943 39 25 10.
- Donibaneko Udal Ludoteka. Helbidea: J.J. Otaegi plaza, z/g. Posta elektroniko bidez mezua idazteko, egin klik hemen. Telefono zenbakia: 943 34 43 28.
- Antxoko Udal Ludoteka: Helbidea: Eskalantegi, 45 (behin-behineko kokapena: Loreto bidea 2, 20017 Donostia). Posta elektroniko bidez mezua idazteko, egin klik hemen. Telefono zenbakia: 623 28 62 60.
