'Pilotariak' filma grabatuko dute Donibanen
Datorren asteazkenetik ostiralera aurreikusi dute egitea grabaketak. Eragina izango dute horiek trafikoan eta aparkalekuan.
Datorren asteazken, ostegun eta ostiralean Donibane zinema agertoki bilakatuko da, Pilotariak lana grabatuko baitute kale nagusian eta Santiago plazan. Egoera horrek etenaldiak eragingo ditu trafikoan eta zenbait aldaketa aparkalekuan.
Zamalanak 13:00etan bukatu beharko dira, eta garajeen jabeek nahiz bertakoek autoa sartu eta atera ahal izango dute behar dutenean, baina ezin izango dute plazan edota inguruko txokoetan aparkatu. Udaltzainek adierazi dute larrialdi zerbitzuen zirkulazioa bermatuta egongo dela, eta trafiko mozketak ez direla, betiere, 4 minututik gorakoak izango.
Bizkaia plazan, bestalde, gune bat egokituko dute filmaketako ibilgailu teknikoentzat, eta beste bat Nabalaldean filmaketarako beharrezkoak diren gainerako ibilgailuentzat. Bi guneak behar bezala seinaleztatuta egongo direla ohartarazi du udaltzaingoak, hesi eta informazio-kartelen bidez, horiek erabiliko diren ordutegi eta egunekin.