[Bideoa] Euskaraz mintzatzeko lagun bila?
Bueltan da Mintzalagun egitasmoa. Azarotik aurrera, hirukoteka elkartuko dira mintzalagun eta mintzakideak, elkar-elikatzeko.
Gaur arratsaldean, San Pedron, egin dute egitasmoaren aurkezpena. 
Euskara talde txikian praktikatzeko Mintzalagun egitasmoa berrartuko du Pasaiako Udalak 2022-2023 ikasturtean, azarotik ekainera bitarte, zehatzago.
Euskararen erabilera sustatzea da iniziatibaren xede nagusia; izan ere, 2021eko kale erabileraren neurketen arabera, Pasaiako bizilagunen %19ak soilik egiten du euskaraz, nahiz eta hitz egiten dakitenen zenbatekoa %43koa den, eta beste %20 batek jakin ez, baina euskara ulertzen duen.
Erabilera tasa hori handitzen laguntzeko doako zerbitzua eskainiko zaie euren euskara ahalmena hobetu nahi dutenei. Astero hiruko taldeetan egingo dute bat euskara praktikatzeko, haietako batek gidari papera izango duelarik. Patxi Azparren dinamikaren arduradunak zehatzago azaldu ditu nondik-norakoak beheko bideoan.
Xehetasunak
Esan bezala, hirukoteak osatuko dira, ahal dela, barrutika, eta astean behin gutxienez ordubetez elkartuko dira horiek. Bat mintzalaguna (bidelaguna) izango da, titulurik eduki edo ez, euskara ongi dakiena eta, beraz, beste bien laguntzaile edo gidari izango dena solasaldietan. Mintzakidea, berriz, euskara erabili eta hobetu nahi duen pertsona izango da.
Euskaraz lasai eta eroso hitz egin ahal izateko egoerak sortzea da helburua; zentzu horretan, hitzordua leku publikoetan egitea lehenetsiko da.
Matrikulazio aldia urriaren lehen bi asteetan egongo da zabalik. Denbora horretan mintzalagun eta mintzakideen datuak jasoko dituzte arduradunek. Prozesu guztia doakoa izango da; mintzalagunek ez dute kobratuko, eta mintzakideek ez dute ezer ordaindu beharko.
Informazio gehiago behar duena zuzenean jar daiteke harremanetan dinamizatzailearekin posta elektroniko bidez. Izena emateko kasuan, hirukoteek harreman zuzena edukiko dute harekin telefonoz nahiz WhatsApp bidez.
