EH Bildu: "Eskailerek mantenu gabezia oso larriak izan dituzte"
Udal gobernuak eskailera mekanikoen arazoen inguruan egindako adierazpenak "erabat arduragabe eta tokiz kanpokotzat" jo ditu alderdiak.
Denera lau dira goiko auzoak herrigunearekin lotzen dituzten eskailera mekanikoak. 
Trintxerpe eta San Pedroko goiko auzoetako bizilagunak manifestatzen hasi ziren udaran, bero bolada bortitzak astintzen zuenean, euren bizitokietara -Gran Sol, Pablo Enea eta Kanpitxu- igotzea ahalbidetzen duten eskailera mekanikoak etengabe matxuratzen zirelako. Egoera ez zen berria, eta kalera atera ziren, nazkatuta, erantzun errealak eskatzeko.
Horren harira, zenbait adierazpen egin zituen PSE-EE eta EAJk osaturiko udal gobernuak, ziurtatuz erabiltzaile horiek berak zirela eskailera mekanikoen geldialdiak eragiten zituztenak. Arduradun politikoen arabera, mantentze lanetako enpresako teknikariek txozten baten bidez adierazi zuten detektaturiko anomalia gehienak gehienak, “erabilera okerrak” eragindakoak zirela.
Hil honetako osoko bilkuran udalbatzak onartu du eskailera horien mantenura bideraturiko diru-partida handitzea, eta testuinguru horretan zenbait adierazpen egin ditu oposizioko indar nagusiak, EH Bilduk. Haien arabera, udal gobernuak fokua bizilagunengan jarri izana “ez da zilegi”.
“Eskailera horiek mantenu gabezia larriak eta oso larriak izan dituzte azken boladan”, mintzatu dira bilkideak, eta informazio berria eman dute: “2022ko martxoan kontratatutako ikuskapen tekniko batek eskaileren zenbait elementu egoera larrian eta oso larrian zeudela argudiatu zuen, eta lehenbailehen aldatu behar zirela horiek eskaileren funtzionamendu egokia bermatzeko”.
Hori horrela izanik, EH Bilduk uste du udal gobernua berriro ere “utzikeriaz” aritu dela. Are: bizilagunei gobernuaren beraren gabezien errua bota diela. Guzti horren asmoa, koalizio abertzalearen ustez: dirua aurreztea.
