Abitturekin, jarduera fisikorako orientazio zerbitzua doan
Jarduera fisikoa egiten hasi nahi duen edonorentzat dago bideratua zerbitzua. Orientatzaile batek ematen du laguntza.
Maddi Market da zerbitzuaren orientatzailea. Martxan da Abittu zerbitzua, Oiartzungo Udalak jarduera fisikoa sustatzeko eskaintzen duen orientazio zerbitzua. Oiartzuarren bizi kalitatea hobetzera dago bideratua zerbitzua, horretarako jarduera fisikoa giltzarri dela. Orientazio zerbitzua jarduera fisikorik egiten ez dutenentzat begirakoa da. Hori horrela, pertsona bakoitzaren egoera eta beharra baloratuko dira horren araberako prozedurak ezartzeko. Doan da zerbitzua.
Zerbitzuaren erabiltzaileek orientatzaile batekin zuzeneko harremana izango dute, Maddi Marketekin hain zuzen. Hark, pertsonen araberako aholku, irizpide eta informazioa emango dizkie egitasmoarekin bat egiten dutenei. Harekin egoteko aurrez aurre astelehen, astearte, asteazken eta ostiraletan, Elorsoro kiroldegian, 09:00etatik 11:00etara egon daiteke. Aurrez hitzordua hartu behar da, 943 49 25 52 telefono zenbakira deituta edo posta elektroniko mezua bidalita.
Herriko baliabide eta azpiegiturak aprobetxatu eta herritarron osasunean eragina izan dezaketen eragile eta zerbitzuekin elkarlana sustatzen ditu Abittuk: udaletxeko sail eta zerbitzuak, anbulatorioa, kiroldegia, ikastetxeak… “Horietan Abittu zerbitzua mesedegarri izan dakioken pertsona bat ezagutzen badute, Abittuko orientatzailera bideratzen dute, bertan bere behar eta interesen araberako plangintza osatzeko”, azaldu dute udaletik: “Elkarlan honen emaitza agerikoa da, erabiltzaile gehienak osasun zentrotik edo udaleko ongizate zerbitzutik bideratu baitira Abittura”.
2018ko martxoan abiatu zuten Abittu egitasmoa. Ordutik gaur arte 100 bat izan dira zerbitzua baliatu duten oiartzuarrak, gehienak emakumeak eta 40 urtetik gorakoak.
