'Beldur barik' jarrerak, lehiaketara
Emakumeek jasaten dituzten bereizkeria egoerei aurre egiten dieten neska-mutilen adierazpenak bideotan jaso nahi dituzte.
Ikus-entzunezko formatuan bidali beharko dira 'beldur barik' mezuak, parte hartzeko. 
EAE mailako Beldur Barik lehiaketak 13 urte daramatza dagoeneko martxan, eta Pasaia estreinakoz atxikiko zaio saiakerari aurten. Emakumeek jasaten dituzten bereizkeria egoerei aurre egiten dieten gazteen adierazpenak bultzatzea da lehiaketaren xedea.
Parte hartzeko aurkezten diren ikus-entzunezko lanek errespetuan, berdintasunean, askatasunean, autonomian, erantzukizunean eta indarkeria sexistaren gaitzespen irmoan oinarritutako jokabide eta jarreren adierazgarri izan beharko dute.
Formatuari dagokionez, edozein adierazpen artistikotan oinarrituriko lanak aurkez daitezke lehiaketara, baldin eta ikus-entzunekoak badira: flashmobak, errezitatutako poemak edota kameraren aurrean irakurritako hausnarketa testuak, bideoklipak, dantzak, film laburrak, performanceak…
Horiek guztiak lehiaketa nagusira aurkeztu beharko dira, eta Pasaiatik aurkezten diren horiek herri mailako lehiaketan ere hartuko dute parte.
Xehetasunak eta oinarriak
Parte hartzaileak 12 eta 20 urte arteko gazteak izango dira, hiru kategoriatan banatuta: lehena, 2010 eta 2008 urteen artean jaiotakoena; bigarrena, 2007 eta 2005 urteen artean; eta hirugarrena, 2004 eta 2002 urteen artean jaiorikoena.
Lanak aurkezteko epea azaroaren 11n bukatuko da eta Beldur Barik-en webgunearen bitartez egin beharko da hori. Sari banaketa, berriz, azaroaren 23an egingo da. Xehetasun gehiago aipaturiko webgunean aurki daitezke.
