Lezoko musika eskolako ateak, helduentzat ere zabalik
Gehienbat helduentzako izango diren ikastaroetarako izen emate epea zabaldu du Tomas Garbizu Lezoko Udalaren Musika Eskolak.
Tomas Garbizu musika eskolaren ataria. Tomas Garbizu Lezoko Udalaren Musika Eskolak hilaren 17an zabalduko du helduentzako ikastaroetarako izen emate epea. 28ra arte eman daiteke izena horietan, arratsaldez, 16:30etik 20:00atar eskolan bertan. Ikastaro horiek nagusiki helduentzat diren arren, udalak zehaztu du badirela zenbait salbuespen, hau da, ikasle gazteek badute hainbatetan izena emateko eskubidea.
Bi eratakoak dira ikastaroak. Lehen multzoa musika tresnena da. Arlo horretan, trikitixa, pianoa, klarinetea, saxofoia, txistua, flauta, perkusioa, biolina, biola, biolontxeloa, akordeoia, tronpeta, gitarra, ukelelea, ukelelea jazz, baxu elektrikoa, bateria, atabala, darbuka*, tronboia*, tuba*, bonbardinoa* txalaparta*, dultzaina*, alboka* eta panderoa* (* ikurra dutenak haur eta helduentzako ikastaroak dira).
Bigarren multzoa, bestelako ikastaroena da. Hala nola talde instrumentalak (konboak, folk, rock…), musika elektronikoa, ganbara musika eta errepertorioa, musika hezkuntza helduentzat (+75 urte), musikoterapia (behar bereziak dituzten haurrekin), eta musika hezkuntza goiztiarra (1-3 bitarteko haurrekin).
Informazio gehiago behar duenak Tomas Garbizuko telefono zenbakira dei dezake (943 52 99 99) edo hango posta elektronikora idatzita ere erantzuna izango du.
