"Bizikidetza arazoekiko" kezka agertu dute bizilagunek
Azken urteetako jendetsuenak izan dira aurtengo auzo batzarrak. Besteak beste, hondakinak, kotxeen abiadura, edo aparkalekuak aipatu dituzte.
Guztira 137 lagun bertaratu dira udalak auzoz auzo antolaturiko batzarretara. 
Atzo bukatu ziren Oiartzungo udal gobernuak auzoz auzo egin dituen batzarrak. Azken urteotako jendetsuenak izan dira, eta “bizikidetza oztopatzen” duten arazoekiko agertu dute kezka handiena bizilagunek.
Gobernu taldeak datua eman du: 137 bizilagunek hartu dute parte –iaz baino %26 handiagoa da zifra hori–. Bertaratu direnen artean, emakume eta gizonen presentzia parekidea izan da, eta adinari dagokionez, auzotar gehienak –%77– 31 eta 65 urte bitartekoak izan dira.
Ordezkari politikoek baietsi dute auzotarrek bilkuretan egindako ekarpenak jaso dituztela 2023 urterako aurrekontuen proposamena osatzeko. Jexux Leonet alkatea asebete mintzatu da saiakerari buruz: “Oiartzun hobetzen jarraitzeko proiektu estrategikoak ditugu martxan eta hauek ere herritarrengan interes handia sortzen dutela ikusteak pozten gaitu”. Auzoetan “ekarpen asko” jaso dituztela eta bileretan bizilagunen arteko adostasunak ere lortu direla jakinarazi du.
Auzotarrak ere, pozik
Bertaratutakoentzat ere probetxugarriak izan dira saioak, bileren ondoren betetako galdetegiko emaitzen arabera: batez beste 8 puntutik gorako notak eman dizkiete parte hartzaileek saioei. Hala ere, hurrengo auzo batzarretan bizilagun gehiagok parte hartzea garrantzitsua dela nabarmendu dute askok.
Jasotako ekarpen gehienak “bizikidetza oztopatzen duten arazoen” inguruan izan dira: hondakinak lurrera botatzea, ibilgailuen abiadura altuegia, aparkatzeko tokiak ez errespetatzea, mugikortasun neurriak ez betetzea… Auzoetan gauzatzeko lan eta proiektu ezberdinen proposamenak ere egin dituzte bizilagunek.
Auzo guztietako aktak Oiartzungo Udalaren webgunean daude ikusgai, Auzoak atalean.
