HelduFit, helduentzako programa berria
Pasaiako Kirol Orientazio Zerbitzuaren erabiltzaileek orientatzaileak bidalitako ariketak taldean burutu eta bere laguntza zuzena edukiko dute.
Pasaiako Kirol Orientazio Zerbitzuaren erabiltzaileek, betiko zerbitzuak edukitzeaz gain, ikasturte honetan jarduera gehigarri batean parte hartzeko aukera izango dute: HelduFit programa. Programa berri horrek, kirol orientazio zerbitzuko orientatzaileak bidalitako ariketak taldean burutu ahal izatea eta orientatzailearen laguntza zuzena edukitzea ahalbidetuko du.
HelduFiten helburua da, erabiltzaileek ariketak ikasi eta praktikatzeaz gain, ariketak modu autonomoan egin ahal izatea. Saio horiek Xabier Rodriguez Pasaiako orientatzaileak dinamizatuko ditu.
Saioak diseinatzerako garaian, erabiltzaileen artean antzeman dituzten bost patologia nagusienak hartu dituzte kontuan: obesitatea, artrosia, hipertentsioa, diabetesa eta oreka galtzea. Bost patologia horiek ez dauzkaten erabiltzaileei ere programan parte hartzea gomendatzen diete, eta orientazio programako parte hartzaileez gain, Pasaiako gainontzeko herritarrei ere luzatu diete saioetara bertaratzeko deia.
Erabiltzaileek edozein barrutiko saioetan parte hartzeko aukera izango dute, saioak lau barrutietan egingo baitira. Barruti bakoitzean lau saio aurreikusi dira, eta asteartetan izango dira, 10:30etik 11:30era.
Saioetara eraman beharrekoa:
- Kirola egiteko arropa eta oinetako erosoak.
- Indar gomak, edukiz gero. Bestela programak eskainiko ditu.
- Ur botila bat.
- Izerdia lehortzeko toalla txiki bat.
Izen-emateak
Izena emateko, 634 55 50 49 telefonora deitu edo aktibatu@pasaia.net helbidera idatzi beharko dute interesdunek. Taldeak gehienez hamar pertsonakoak izango dira, eta hamar pertsona baino gehiagok izena emango balute, bigarren talde bat osatzeko aukera legokeela zehaztu dute.
Hona hemen Xabier Rodriguez Pasaiako orientatzailearen esplikazio bideo bat:
