Pasaia Kayakek bi ordezkari eraman ditu Munduko Txapelketara
Eukene Saez eta Iñaki Fernandezek osaturiko bikoteak Portugalera egin du bidea talde pasaitarra ordezkatzeko. 'Top-10'-a gertu izan dute.
Fernandez eta Saez Munduko Txapelketako oholtzan, bikoteen aurkezpenean, Portugalen. 
Joan den astean jokatu zen Ponte de Liman (Portugal) Ur Lasaietako Maratoiko Munduko Txapelketa kategoria nagusietan, eta bertan izan ziren, Pasaia Kayak ordezkatzen, Eukene Saez eta Iñaki Fernandezek osaturiko bikote urdina. Master kategorian aritu ziren.
Modalitateko urteko probarik garrantzitsuena izan zen azken hura, eta maila oso handikoa, beraz. Espainiako txapelketan K-2 mistoan zilarrezko domina irabazita lortu zuen bikote pasaitarrak mundialerako txartela Espainiako selekzioarekin, eta binakako lehian ez ezik, Fernandezek banakakoan ere parte hartu zuen.
19 kilometroko proba gogorrari egin behar izan zion aurre bakarlariak, eta hasieratik talde nagusiaren ubera galdu bazuen ere, bigarren talde batean sartu zen, top-10erako borrokan. Azken itzulian, baina, ezin izan zion bere taldetxoaren erritmoari eutsi, eta hamalaugarren izan zen azkenean.
Hori horrela ere, K-2 mistoan zituzten itxaropenik handienak jarrita pasaitarrek, eta hurbil izan zuten lehen hamarren taldea. Irteera benetan azkarra izan zen, “azkarregia”, prestatzaileen arabera, eta pasaitarrek ezin izan zioten erritmoari eutsi. Azkenean, meritu handiko hamaikagarren postua erdietsi zuten 15,4 kilometroko ibilbidean.
