Pasaiak eta Touringek derbia jokatuko dute bihar
Oarsoaldeko taldeen arteko partida Jesus Mari Zamoran jokatuko da, 16:30ean. Egoera ezberdinean iritsiko dira bi taldeak.
Pasaiako hamaikakoa etxeko azken partidan. Hirugarren Mailako Oarsoaldeko derbia jokatuko da bihar Jesus Mari Zamora futbol zelaian, 16:30ean. Urte askoren ondoren, Pasaiak eta Touringek indarrak neurtuko dituzte Hirugarren Mailan garaipenaren bila.
Bi taldeak bolada ezberdinean iritsiko dira partidara. Pasaia sailkapeneko laugarren postuan da, bederatzi punturekin. Zurigorriek ezin hobe hasi dute aurtengo sasoia, eta jokatu dituzten lau lehietatik hiru poltsikoratu dituzte. Partida bakarra galdu dute, etxean jokatu zuten azkena. Touring, berriz, ligako azken postuan dago, bi punturekin. Gorritxoek soilik bi berdinketa atera dituzte orain arte, eta beheko postuetan dena oso berdindua badago ere, garaipenak lortzen hasteko beharra dute, daramaten bolada txarra ahalik eta azkarren iraultzeko.
Oarsoaldeko derbiko sarrerek 10 euroko prezioa dute.
