[Bideoa] Xalto, esker oneko laguntzen ari direnekin
'Herrian xaltoka' egitasmoaren finantzazioan laguntza ematen ari direnei eskerrak eman dizkie Lezoko pailazoak.
Astebete darama ekarpenak jasotzen Herrian xaltoka egitasmoak. Xalto pailazoarem proiektua da, eta Lezoko kultura, euskara, jendea eta ondarearen ezagutaraztea dago Herrian xaltoka egitasmoaren oinarrian. Hori, hainbat euskarriren bitartez egiteko asmoa du herriko sortzaileak, bideo bidez batez ere: besteak beste, herriko pertsonekin elkarrizketak egingo ditu. Hori garatzeko, baina, laguntza behar du. Finantzazioa.
Gipuzkoako Foru Aldundiaren Piztu Meta! proiektuan onartua izan denez, bertatik finantzazioa lortzeko lanean dabil Xalto. Matchfunding kanpaina abiatu dute Piztu Meta!-en barruan lezoarraren eta beste hamalau iniziatibak laguntzeko, eta Goteo plataformaren bitartez diru bilketan ari dira. Sormena aktibatzeko egitasmo berritzaileak aukeratu dituzte Piztu Meta!-ren barruan, eta proiektu horiek garapen teknologikoarekin eta garaiko premiekin ahalik eta lotura onena izan behar dute.
Xaltok bideo bidez eskerrak eman dizkie orain arte ekarpena egin duten den-denei. Jakinarazi du, ezarritako helburuaren %29ra iritsi dela, baina hala ere, ekarpenak beharrezko direla oraindik ere. Beraz, beheko bideoan, Xaltoren esker mezuak eta hainbat iradokizun.
