Portuko zaratak herrigunean duen eraginaren azterlana, jendaurrean
Hilabetez izango da jendaurrean, udalaren webgunean, Polentzarrenen, Kale Nagusian, eta Aralar kalean portuak sortzen duen zarataren azterlana.
Lezoko Udalak adierazi du jendaurrean dela Lezoko Soinu-Ingurua Hobetzeko Planaren barruan, hau da, Zaraten Ekintza Planaren barruan egindako azterlan bat. Udal erakundearen webgunean kontsulta daiteke agiria, eta lezoarrek horri ekarpenak egiteko aukera izango dute. Finean, portuko jardueragatik kaltetutako hiriguneko kalitate akustikoa hobetzeko planaren barruko azterlan bat da erakusketan jarri dela.
2020ko otsailean onartu zuen Zaraten Ekintza Plana udalak. Bertan, gehienezko zarata maila gainditzen diren lau gune identifikatu ziren, eta horiek Babes Akustiko Bereziko Eremu (BABE) izendatu; horietako batek zuzenean eragiten dio herriguneari, BABE3 izenekoak zehazki; hori da jendaurrean jarri duten agiria.
BABE3 horretan azterketa zehatza egin du udalak, Cecor enpresaren bidez, eta Gipuzkoako Foru Aldundiaren babes ekonomikoarekin: herriguneko eremu horretan zortzi neurketa-puntu ezarri ziren, sonometro homologatuak erabiliz, kaltetutako eremua behar bezala definitzeko. Hala, hasiera batean Zaraten Ekintza Planean jasotako herriguneko eremu hori aldatu dute, zabaldu egin dute: portuko zaraten kaltetu Polentzarrene, Kale Nagusia eta Donibane kalea ezarri zituzten hastapenean, baina Aralar kalearen zati bat ere sartu dute BABE horretan.
Neurketak eginda, kaltetutako eremuak identifikatuta daude. Baina udalak zehaztu du Pasaiako Portu Agintaritzari dagokiola herriko eremu horrek jasaten duen gehiegizko zarata ezabatzeko edo murrizteko neurriak hartzea. Alta, udalak azaldu du Andreoneko zarata neurgailua mantenduko duela, eta aldi berean, herritarrek nahiz udaltzainek jasotako intzidentzia edo kexak portuari jakinarazten jarraituko duela. Ekarpen eta kexa horien kudeaketa eta komunikazioa hobetzeko neurriak hartu ditu udalak.
