[Argazki galeria] Eraldaketa eta burujabetza, plazara
Alternatiben Oihartzuna egin da gaur bigarrenez azokak, mahainguru, bazkari, bertso eta kontzertuekin. Ez da aspertzeko astirik egon Oiartzunen.
Goizeko azokako argazkia. “Burujabetza eta eraldaketaren norabidean”, bigarren urtez egin dute aurten Alternatiben Oihartzuna gaurko egunean zehar. Goizean goizetik bete dute Done Eztebe plaza ekoizle, sortzaile, artisau eta orotariko herriko eragileek. Eguraldia lagun, giro ederrean eman dute goiza.
Oiartzuar denak elkartu dituen unea herri bazkaria izan da. Herriko produktuekin prestatu dituzte jakiak, eta bertaraturikoei eskerrona adierazteko probestu dute hamarnaka bizilagun bildu dituen unea.
Bazkariarekin batera egin dute egunaren inguruko gogoeta, ‘hariaren’ metaforaren baitan eraiki dutena. Erresistentzia borrokatik, eraikuntza borrokara doan haria; lanaren transmisioa sostengatzen duen haria; sormenetik, elkartasunetik, herri anitza eta koloretsua korapilatzen duen haria; bizitzak apurka apurka berreskuratuaz eta alternatibak eraikiaz aurrera daraman haria; oinez aurrera, bidean, elkarrekin, indarrak batzen eta ametsak lotzen dituen haria; norbanakotik kolektiborako noranzkoan soilik egin daitekeen bidea josten duen haria; herriko alternatibek inperfekzio perfektu batean egiten dute topo, elkar elikatzen dira eta elikadura horretatik josten eta loratzen da biharko herria.
Goizean zehar mahainguruak egin dituzte gaurko eta biharko herriaz eta nazio mailatik Oiartzunerako bideaz hitz egiteko. Bizitza, kapitala, indarrak batzea, eraldaketa, burujabetza, hausnarketa, zaintza, alternatiba, autogestioa… izan dira presente egon diren kontzeptuetako batzuk, gaurko egunari zentzua ematen diotenak.
Bukatzeko, “pertsona askeen herrialde bat” sortzen ari direla eta sortuko dutela eutsi dute antolatzaileek. Herrialde hori koloretsua, hari sendoz lotua, herriaren eta herritarren artean saretua, bizitza emango diona eta bizitza bera zainduko duena izango da. “Eguneroko praktika eraldatzaile eta burujabetik abiatuta, komunitate bat saretzea dugu helburu, eta horretan dihardugu, Oiartzun eta Euskal Herria burujabe izan arte”, nabarmendu dute kideek dituzten nahi eta helburuez.
Sabelak bete ondoren, bertso saio bat egin da Done Eztebe plazan Josu Ibarguren eta Irati Alcantarilla bertsolariekin. Eguna jai giroan bukatzeko, kontzertuen txanda izango da, 22:00etatik aurrera. Herriko taldeak igoko dira oholtzara gaua girotu eta eguna behar bezala bukatzeko.
