Alkatea: "Trintxerpetarrek aparkaleku esklusiboa izango dute"
Zirizako aparkaleku berria bertakoek bakarrik erabili ahal izango dute gauez, 19:00etatik 8:00etara, eta asteburu edo jaiegunetan.
Aparkaleku berria, obretan. 
Izaskun Gomez alkateak iragarri du Trintxerpen eraikitzen ari diren aparkaleku berria trintxerpetarrek soilik erabili ahalko dutela gauez eta asteburu nahiz jaiegunetan. Horretarako txartel berezia jaso beharko dute HAZ bulegoan.
Ibilgailuentzako sortzen ari diren eremu berria Adinberri zentroaren eraikuntzaren zuzeneko ondorioa da. Izan ere, berehala hastekoak diren lan horiek direla kausa, Lasako aparkalekua desagertu egingo da epe laburrean, eta ordezko gisa sortzen ari dira Zirizako berria.
Egunean zehar, beraz, edonork aparkatu ahalko du ibilgailua parking berrian, baina ezingo du luzaroan bertan utzi, izan ere, 19:00etatik 08:00etara eta asteburu nahiz jaiegun guztietan zehar, Trintxerpeko herritarrek bakarrik erabili ahalko baitute gune hori.
Aparkatzeko txartelak
Aparkatzeko txartel berrien izapideak ahalik eta gehien bizkortzeko, udal arduradunak ohartarazi du datozen asteotan ohar bat helaraziko zaiela ibilgailua barrutian helbideratuta duten herritar guztiei. Jakinarazpen horretan adieraziko diete noiz pasa daitezkeen HAZ bulegotik —Alkateordetzan dago— txartela jasotzera.
Baimen hori kotxeen aurrealdeko kristaletan itsatsi beharko dute jabeek, ahal dela, horien behealdean. Eranskailu horri esker, udaltzaingoak erraz egiaztatu ahalko du erabiltzaile horrek bertan aparkatzeko eskubidea duela.
Txartel itsasgarria eskuratu ahal izateko, honako baldintza hauek bete beharko dituzte eskatzaileek: Trintxerpen erroldatuta egotea eta ibilgailua ere bertan helbideratuta izatea, tokiko zerga-betebeharrak egunean izatea, eta ibilgailuaren dokumentazioa indarrean egotea (IAT eta nahitaezko asegurua).
