Alkatearen erantzunak ikasleei
Eskola Agenda 2030aren barruan, iaz ikasleek egindako proposamenak erantzun ditu alkateak, eta aurten lantzen ari direnaren berri izan du.
Hilaren 25ean (asteartean) Aizpea Otaegi Errenteriako alkateak eta herriko ikasleek osoko bilkura egin zuten udaletxean. Ikasturte berriko Eskolako Agenda 2030 programa hasi zuten horrela. Lehenik eta behin, iazko konpromisoei erantzun zien alkateak gaztetxoei. Izan ere, 2021-2022 ikasturtean Zelaiak, larreka eta landare itsutasuna gaiari eutsi zioten ikaskideek Agenda 2030aren barruan, eta orduko hartan aurkeztutako proposamenei banan-banan argia eman zien Otaegik.
Aurtengo ikasturtean, berriz, Energia, bizitzaren motorra gaitzat hartuta egingo dute lanketa haurrek. Nazio Batuen Garapen Jasangarrirako 7. helburua da hura. Energia denentzat eskuragarri izan behar dela da gaiaren premisa, baina ez kutsatzailea. Beraz, gaiaren aurkezpena egin zioten udal buruari.
