Donibaneko igogailu berria egiteko obrak esleitu ditu udalak
Aurreikusitako epeak beteko balira, 2023ko ekainerako martxan beharko luke igogailuak. Obrak bi asteko epean hasiko dira.
Donibaneko Lezobide eta Bordalaborda kaleak lotuko dituen igogailua eraikitzeko lanak esleitu berri ditu udalak. Aurreikuspenen arabera, obra bi asteko epean hasiko da, eta sei hilabeteko iraupena izango du, 445.891 euroko aurrekontuarekin (BEZa barne). Epeak beteko balira, ekainerako martxan legoke.
Loreto Osa EAJren bozeramaile eta Hirigintza zinegotziak “oso balorazio positiboa” egin du, aurreko deialdian proposamenik aurkeztu ez, eta hutsik geratu baitzen lizitazioa. Izaskun Gomez alkateak eskertu egin du teknikarien ahalegina, eta bigarren lizitazio honetarako izapideak “azkar egin izana”. Bi politikariek uste dute lotura berriak hobekuntza handia ekarriko duela eremu osoko irisgarritasunean.
