[Bideoekin] I. Beldur Barik lehiaketako irabazleak saritu dituzte
'Pasaiako herritik dator notizia...' eta 'Besteen eskuetan' lanak izan dira, hurrenez hurren, lehen eta bigarren kategorietako lan irabazleak.
Lehen kategoriako irabazlea, Xuban Sousa, eta Loreto Osa Gizarte Ekintzako eta Berdintasuneko zinegotzia. 
Atzo egin zen Pasaiako I. Beldur Barik lehiaketako sari banaketa Antxoko Kultur Etxean, eta bi lan saritu zituen udalak, Itziar Saenz de Ojer clown-aren laguntzarekin. Lehen kategoriako saritua Xuban Sousa izan da, Pasaiako herritik dator notizia… lanarekin; bigarren kategoriakoa, berriz, Maddi Santos, Irati Garcia, Nora Muñoz, Iraia Lopez, Uxue Tellado, Irune Salaberria, Onintza Txapartegi, Peru Cristobal eta Eneritz Biurrun, Besteen eskuetan lanari esker.
Lehen kategoriako lanak (12-14 urte) indarkeria matxistaren aurkako aldarria egin du, eguneroko jokamoldeetatik abiatuta, eta indarkeria testuinguruan jarri eta hainbat faktore ere identifikatuz. Bigarrenean, (15-17 urte) Kuadrillategiko gazteek euren adineko neska baten egunerokoa kontatuz, sare sozialetan jasandako hainbat egoera matxista ikusarazi dituzte (kontrola, irudiaren gaineko epaila, harremanak…) . Hirugarren kategorian (18-20 urte) ez da lanik aurkeztu.
Lau lan aurkeztu dira guztira lehiaketara, bina kategoria bakoitzean, guztira 15 gaztek hartu dutelarik parte. Loreto Osa Gizarte Ekintza eta Berdintasun zinegotziak eskerrak eman dizkie horiei: “Benetan lan politak egin dituzue eta ezin eskertuago gaude lehenengo lehiaketa honetan parte hartzeko erakutsi duzuen borondate eta gogoagatik”. Parte-hartzaile guztiei diplomak banatu dizkie zinegotziak, eta irabazleek 200 euroko saria jaso dute, LaurakBat elkarteko dendetan gastatzeko.
Bukatzeko, Osak, emakumeen Azaroaren 25aren atarian, aldarrikatu du haur, gazte zein helduen eginbeharra dela indarkeria matxistaren aurrean Beldur Barik jarrera erakustea eta indarkeria matxistarik gabeko Pasaia bat eraikitzen jarraitzea: “Mila esker berriro ere egiteko horretan bidelagun izateagatik”.
Honakoak dira sarituak izan diren bideoak.
1 KATEGORIA
- Pasaiako herritik dator notizia… Egilea: Xuban Sousa. Ikusi bideoa.
- Azken juizioa. Egileak: Aitor Lopez Gabilondo, Lara Estevez Pujana, Iria Fernandez Paisal eta Maria Saraiva Lopez. Ikusi bideoa.
2 KATEGORIA
- Besteen eskuetan. Egileak: Maddi Santos, Irati Garcia, Nora Muñoz, Iraia Lopez, Uxue Tellado, Irune Salaberria, Onintza Txapartegi, Peru Cristobal eta Eneritz Biurrun. Ikusi bideoa.
- Gogoratu. Egilea: Ioar Alonso Erauskin. Ikusi bideoa.
-
