Eguberrietan, eskubaloi campusa Oarsoaldean
Ereintzak, Munttarpek eta Donibane Eskubaloiak antolatu dute haurrak eskubaloira hurbiltzeko iniziatiba. Abenduaren 11ra arte eman daiteke izena.
Munttarperen campus baten artxiboko irudia. Argazkia: Munttarpe. Oarsoaldeko hiru eskubaloi klubek, hau da, Errenteria-Oreretako Ereintzak, Lezoko Munttarpek eta Donibane Eskubaloiak, Eguberrietan eskubaloi campusa antolatu dute 8-12 adin tarteko haurrentzat (2010etik 2014era jaiotakoak, bi urte horiek barne). Zehazki, abenduaren 26tik 30era izango da hiru herrietako kiroldegietan, 09:30etik 13:30era egunero. Hiru udalerri horietako udalen babesa du haurrak eskubaloira hurbiltzeko jarduerak.
Izena emateko epea abenduaren 11ra arte dago zabalik (Sartu hemen izena emateko). Hala, izen ematearen prezio arrunta pertsonako 50 eurokoa izango da, eta familia unitate batek bi haur (edo gehiago) apuntatu nahiko balitu, bigarren haur horregatik 35 euro ordaindu beharko lituzke, hau da, beherapena luke bigarren senidea apuntatzeak (baita bigarrenetik aurrerakoek ere). Alta, kirol elkarte horietako bazkideen seme-alabek merkeago eman dezakete izena: lehen haurraren zenbatekoa 45 eurokoa litzateke, eta bigarrenetik aurrera 30ekoa litzateke buruko prezioa.
Campusaren gaineko informazio gehiago jaso nahi duenak, posta elektroniko mezua bidal dezala argibide eske.
