Lilitegiko 85 abesti, denentzat eskuragarri
Pasaia-Lezo Lizeoaren lilitegietan erabiltzen diren abestien bilduma egin dute Maider Hipolitok eta Olatz Otxoak.
Maider Hipolitok eta Olatz Otxoak osatu dute abestien bilduma. Pasaia-Lezo Lizeoaren lilitegietan egunero-egunero abesten dituzten kantak, era librean entzun eta deskargatzeko aukera jarri du nahi duenaren eskura Lizeoak. Hori bakarrik ez: kantu guztien letrekin liburuxka ere egin dute.
Orotara, 85 dira eskura daitezkeen abestiak: horiek guztiak Maider Hipolitok (ahotsa) eta Olatz Otxoa Otxi-k (gitarra eta ahotsa) grabatu dituzte. Egun, Antxoko lilitegiko hezitzailea da Hipolito, eta Lezokokoa Otxoa; biek Trintxerpekoan bat egin zutenean egin zituzten grabazioak, Otxoak Errenteria-Oreretan duen estudioan.
Abestiak gaika daude antolatuta (eskuekin lantzekoak, animalienak, dantza egitekoak, instrumentuen ingurukoak…), orotara 11 atal osatu direlarik. Horietako bat Bestelakoak atala da: han, gai zehatzik gabeko beste hamabost abesti sartu dituzte.
