Proisak datorren uda baino lehen izango du estalkia
252.330 euroko aurrekontuarekin esleitu berri ditu lanak udalak. Obrak datorren uda baino lehen bukatuko dituztela aurreikusi dute.
252.330,45 euroko (BEZ barne) aurrekontua du eremua estaltzeko obrak. 
Pasaiako Udalak Jaizubia Obras y Servicios, SL enpresari esleitu dio San Pedroko Proisa erabilera anitzeko espazioa estaltzeko obra, 252.330,45 euroko (BEZ barne) aurrekontuarekin. Estalkia datorren uda baino lehen bukatzea aurreikusi dute.
Loreto Osa Hirigintza zinegotziak obraren garrantzia nabarmendu du: “Herritarrek gozatzeko leku estali bat izango dute, txikientzat zein helduentzat, obrak San Pedro frontoiaren atzealdea estaltzean datzalako. Horrela, pasaitarrek hainbat jarduera antolatu ahal izango dituzte meteorologiaz arduratu gabe”.
Osak ohartarazi nahi izan du obra hori 2021. urtearen bukaeran esleitu zela baina “udalarekin zerikusirik ez zuten arrazoiengatik eta enpresa esleipendunaren ustekabeengatik”, kontratua bertan behera utzi behar izan zela.
