Hausnarketa egiteko une aproposa dela uste du Lezoko EH Bilduk
Aralar eta Ijur arteko eremuan lur-jausia gertatu ondoren, bizilagunen artean, proiektuaren inguruko "zalantzak eta ezinegona" areagotu direla ziurtatu dute bilkideek.
2022ko apirilean Aralar eta Ijurko arteko eremuan zartadurak agertu zirela jakinarazi zuten bizilagunek. Ordutik, zartadurak handitzen joan ziren abenduaren 5ean lur-jausia gertatu zen arte. Bitarte horretan EAJ-PSE-EEren gobernuak azalpenik eman ez zuela salatu dute bilkideek.
Lur-jausiak, bizilagunen artean, proiektuaren inguruko “zalantzak eta ezinegona” areagotu zituela ziurtatu dute eta horregatik, unea hausnarketa egiteko baliatu beharko litzatekeela uste dute: “herriko beharrak aztertu, proiektua berraztertu eta etorkizunera begirako proiektua landu”. Orubea herriaren erdialdean dago eta bertan eraikitzen den proiektuak herrian izango duen eragina kontuan izan beharko litzatekeela iritzi dute.
Egungo proiektua 2010ean idatzi zen; babespeko 52 etxebizitza eraikitzea eta anbulategi berria eraikitzea jasotzen duen proiektua.
