Durango txikia gaur zabalduko dute, Kultura Aretoan
Lezoko Euskal Liburu eta Disko Azoka hilaren 23ra arte izango da irekita, goizez eta arratsaldez. Euskal sortzaileen azken berritasunak jasoko ditu topaguneak, tartean Lezoko egileenak daudelarik.
Euskal sortzaileek berriki egindakoak, eta garai batekoak izango dira salmentan. HITZA Gaurtik hilaren 23ra arte Lezoko Disko eta Liburu Azoka zabalik izango da, Kultura Aretoan. Durango txikia herrian. Egun horietan, 11:00etatik 13:00etara eta 17:00etatik 19:00etara jasoko dituzte bisitari eta erosleak; hobe erostea, soilik bertaratzea baino, euskal kulturaren erakusle den azokak bertako sortzaileentzat pizgarri izan nahi duelako. Oroitzene AEK-k herriko jai batzordearen babespean antolatu du Lezoko Eguberrietan klasiko den azoka.
AEK-ko Edurne Lizarazuk azaldu du aurreko urteetako eskema bertsua izango duela aurtengo topaguneak. Hala, bai azokaren muntaian nahiz salmentan izango direnen txandak jai batzordearen bitartez bideratu direla jakinarazi du, eta salgaiei dagokienez, denetik izango dela: berritasunak, eta labetik garai batean ateratako liburu eta diskoak.
Azken horien artean, Joxe Luix Agirretxeren Heriori ebatsitako poemak olerki liburua edo Lander Zurutuzaren Lezoko toponimia aipatu ditu. Herrikideekin jarraituta, Lucia Aranburuk egin duen egutegia ere aurkeztu eta salgai jarriko du. Ilargiren Beldurrarekin dantzan diskoa ere eskuratzeko aukera izanen da, eta aldi berean, Miren Azkarateren Ikusezinak. Erbesteratuen haurrak lanak ere tokia izango du azokan; hilaren 23an aurkeztuko du Azkaratek herrian.
Donostiako Hontza liburu dendarekin duten elkarlanagatik lortu dituzte salmentan izango diren gaietako asko. Hala, hogei eurotik gorako gastua egiten dutenek, sei euroko aurrezte bonua eskuratuko dutela jakinarazi du Lizarazuk: «Iazko salmentak onak izan ziren. Ea aurtengo azokan kopuru horietara iristerik dugun».
