Gas kontsumoan estimazio okerrak hautematen ari dira fakturetan
Erreklamazioak jasotzen ari da Oarsoaldeko Kontsumo Bulegoa kontsumo-estimazio okerrengatik, eta fakturak berrikustera deitu dute horregatik.
Gas kontsumoan erreparatzeko aholkua eman du kontsumo bulegoak. 
Oarsoaldeko Kontsumo Bulegoak azken hilotako gasaren fakturak joan den urteko ekitaldi berdinekoekin alderatzera deitu ditu bizilagunak. Izan ere, adierazi dutenez, kontsumo estimazio okerrak hautematen ari baitira.
Gasaren prezioa garestitzearen ondorioz, azken aldian askok erabaki dute beren kontratua ABTra pasatzea (Gasaren Azken Baliabideko Tarifa), horren prezioa merkatu libreko gasarena baino merkeagoa baita, eta datozen hilabeteetan ere horrela izaten jarraituko duela aurreratu dute bulegotik.
Kontsumo Bulegoak aldaketa hori egin dutenei bereziki gomendatu die “ondo begiratzeko” ordura arte izan duten konpainiak emandako azken faktura, izan ere, azken faktura horretan gas-kontsumo estimatua (irakurketa estimatua) kobratu zaien pertsonen hainbat erreklamazio jaso baitituzte, “benetako irakurketa baino askoz handiagoa”.
Estimazio hori zuzena izan den jakiteko, faktura aurreko urteko aldi berari dagokionarekin alderatzeko aholkua eman dute bulegotik. Ohartarazi dute, baina, ez dela faktura horren zenbatekoan erreparatu behar, baizik eta kWh-etan. Datu hori irakurketen atalean eman ohi da.
Estimazioa zuzena ez denaren susmoa dutenak erreklamatzera deitu dituzte. Horretarako, edo informazio gehiago jasotzeko, bulegoa zabalik da (Olibet, 6. 20100 Errenteria) astelehenetik ostiralera, 09:00etatik 14:00etara. Telefonoa ere badute: 943 51 01 11.
