Luzuriaga eta Pabinsako lursailak erosi ditu udalak
Pabinsako partzelak ia 8.000 metro koadro ditu, eta Luzuriagakoak 29.000. Pasaiako Udalak, beraz, ia 37.000 metro koadro berri ditu.
Luzuriaga eraikinaren atzealdeko partzela osoak ia 30.000 metro koadro ditu. 
Gaur goizeko ezohiko udalbatzarrean Pasaiako Udalak, alderdi guztien babesarekin, Luzuriaga erosi du (hiru solairuetako bakoitzak 1.200 metro koadro inguru ditu). Udalak ez du bulego-eraikina bakarrik erosi, baizik eta horrek atzean duen orube guztia eta Pabinsakoa —Toyota tailerraren alboan, errekaren atzealdean dagoena— ere.
Pabinsako partzelak 7.949,00 metro koadro ditu, eta Luzuriagakoak 28.972,00 metro koadro. Denera, beraz, ia 37.000 metro koadro berri erosi dizkio Pasaiak Donostiari. Ondoko planoan ikus daitezke partzela horiek.
Luzuriaga, eraikina
Luzuriaga fabrikaren eraikinaren erosketaren zenbatekoa 2.611.000 eurokoa da, eta Espainiako Aurrekontu Orokorretako sei milioi euroko finantzaketa du, Kultura eta Kirol Ministerioaren Espainiako Kultura Ondarearen Institutuak abenduan transferiturikoa.
Erosketa 2023 urte hasieran formalizatu ahal izatea espero du udal gobernuak. Esan bezala, 2,6 milioi euro inbertituko dira eraikina erosteko, eta 6 milioira arteko gainontzekoa birgaitzeko eta egokitzeko lanak egiteko erabiltzea da asmoa.
Izaskun Gomez alkateak ziurtatu du Pasaiako eta Antxoko barrutiko “kultura-garapenaren eta gizarte-jardueraren zerbitzura” jarriko duela eraikina. Besteak beste, bertan kokatuko ditu udalak Azokan garatzen ziren jarduerak, eta udalburuak ziurtatu du bertan izango dute kokalekua jarduera horiek bultzatzen zituzten elkarteek.
