Topoko obren jarraipenerako batzordeari ezetz esan dio gobernuak
EAJ eta PSE-EEk osaturiko udal gobernuak proposamenaren kontra bozkatu du. Podemos abstenitu da, eta EH Bilduk alde egin du.
Topoko lanen aurkezpeneko argazki bat. 
Gaur goizean izandako ezohiko udalbatzarrean bosgarren puntua zen “Topoko obren jarraipena egiteko batzorde informatibo berezia sortzea”. EH Bilduren proposamena ez da, baina, aurrera atera, udal gobernuak kontra bozkatu duenez gero.
Puntuak udalbatzako gehiengo osoaren babesa behar zuen aurrera ateratzeko, eta hori lortzetik urrun gelditu da, EH Bilduko sei zinegotziak izan baitira alde bozkatu duten bakarrak. Ahal Dugu Podemoseko biek abstentziora jo dute, iritzita proposaturikoa ez zela “formularik onena”, eta EAJ (lau zinegotzi) eta PSE-EEk (bost zinegotzi) kontra bozkatu dute.
Botoaren azalpena eman dute Loreto Osak (EAJ) eta Lore Suarezek (PSE-EE). Jeltzaleen ezezkoa, batzordearen sorreraren xedea “ulertu ez izanagatik” etorri da: “Logikoena litzateke obren hasieran eskatu izana”. Zentzugabekotzat jo du, halaber, Osak, eskakizuna, taldea osatuko lukeen aldeetako bati (ETS) ez zaiolako kontsultarik egin. Bide beretik mintzatu da Suarez, eta proposamenari “tindu elektorala” hartu dio.
Plenora hurbildu dira eragindako bi bizilagun: Agustin Migeltorena eta Aszen Lakarra antxotarrak, eta SOS Antxo Koordinakundeko kideak. Eskatu dute EH Bilduren proposamenari emandako ezezkoa ez dadin betikotu, eta ez ditzan itxi komunikaziorako beste ateak etorkizunean. Orain arte bezala jarraitzeko konpromisoa hartu du alkateak: komunikatzeko zerbait dagoenean, komunikatuko zaiela eragindakoei edota interesa agertu duen orori.
Herritarren aldeko mugimenduko kideek uste dute, baina “denboraz justu” gabiltzala, eta erabakiak aurretik hartu behar direla, eta ez, ordea, antxotarren egunerokoa baldintzatuko duten lanak martxan direnean eta atzerabueltarik ez denean. Herrian dagoen “indar eta interesa” euren alde, elkarrekin joateko, probestu dezatela galdegin diete gobernukideei.
