Andonaegiko 21 bizilagun komunitatek jasoko dituzte laguntzak
30 jabe erkidegotik 21ek erabaki dute berroneratze programarekin bat egitea. Guztira 7,2 milioi euroko aurrekontua du planak.
30 jabe erkidegotik 21ek erabaki dute berroneratze programarekin bat egitea. 
Trintxerpeko Andonaegi auzoko bizitegi eraikinak birgaitzeko diru laguntzetara batzeko bi hilabeteko epea bukatuta, guztira 21 jabe erkidegok aurkeztu dute aurreikusitako berroneratze programarekin bat egiteko eskakizuna. Denera 30 dira.
Jarduketa eremuak Bidasoa, Igeldo, Oiartzun, Andonaegi eta Urgull kaleak hartzen ditu. Guztira 7,2 milioi euroko aurrekontua dago zonaldea zaharberritzeko, Eusko Jaurlaritzako Lurralde Politika, Etxebizitza eta Garraio Sailak sustatuta. Pasaiako udalbatzak joan den urrian onartu zituen irisgarritasuna eta energia-eraginkortasuna hobetzeko laguntzen oinarriak.
Izaskun Gomez alkatea asebete agertu da bizilagunen erantzunarekin: “Pozik nago Andonaegiko bizilagunek aukera izango dutelako udalak Eusko Jaurlaritzaren aurrekontuetan sartzea lortu duen funts batzuk baliatu ahal izateko”. Horrekin gogorarazi du birgaitze proiektuak aurrera eramateko eta laguntzak eskuratzen laguntzeko informazio bulegoa martxan dela Andonaegi jauregiko zaindariaren etxe zaharrean. 943 00 43 05 telefonora deitu edo Whatsappa ere bidal daiteke.
