Pasaitarren lau garaipen Batel Ligako lehenean
Horietatik hiru San Juanek eskuratu ditu, eta bestea San Pedrok. Herrialdeko batel liga hamaika estropadakoa izango da.
Pasaiako badian jokoan izan zen atzo (igandea) 2023ko Gipuzkoako Batel Ligako lehen estropada, Sanpedrotarra Arraun Elkarteak antolatua. Jokoan izan ziren zortzi kategorietako estropadetatik, lau garaipen Pasaiako ontziek lortu zituzten.
Horien artetik lehena mutilen Haur Mailakoa izan zen. San Pedro Ak zakura eraman zuen lehena, B ontzia bigarren izan zelarik. San Juan laugarrena izan zen, eta Hibaika bosgarrena.
Nesken Haur Mailakoan, Hibaika Bk laugarren postua eskuratu zuen, seigarrena Hibaika Ak, eta zazpigarren eta zortzigarren izan ziren San Pedro A eta San Juan.
Nesken Promesa Mailan, berriz, San Juan A onena. Kategoria horretan zortzigarren izan zen Hibaika B, eta hamaikagarren San Pedro A. Atzerago gelditu ziren Hibaikaren eta San Pedroren beste ontziak.
Mutilen promesetan, berriz, bigarren izan zen San Pedro A, hirugarren San Juan A, eta laugarren eta bosgarren hurrenez hurren San Pedroren eta San Juanen B batelak. Hibaikarena, ordea, hamaikagarren sailkatu zen.
Nesken Gazte Mailan, San Juan A nagusi, Hibaika laugarren, eta arrosen B ontzia bosgarren. Gazte Mailan ere, baina mutiletan, beste garaipen bat San Juanentzat, hirugarren San Pedro, eta laugarren Hibaika.
Emakumeen Senior Mailan ez zen Oarsoaldeko batelik izan. Bai, ordea, gizonetan: San Juan A, D, C eta B hirugarren, bosgarren, zazpigarren eta zortzigarren izan ziren, hurrenkera horretan. Bi estropada horietan Kaiarribak egin zituen denborarik onenak.
Kategoria guztietako emaitzak xehetasunez ikusteko, klik egin esteka honetan (PDF artxiboa jaitsiko da).
Hamaika estropadakoa
Orotara, hamaika estropada izango ditu Gipuzkoako Batel Ligak, lehena izan zen igandekoa. Horietatik azkena apirilaren 11n izango da, Donibanen. Estropada hori Gipuzkoako Batel Txapelketako sailkapen estropada izango da aldi berean, finalak apirilaren 16an jokatuko direlarik. Euskadiko Batel Txapelketa apirilaren 22 eta 23an izango da jokoan, Zumaian.
