Joxepa Antoni Aranberri Anitzenea aurkeztuko dute ostiralean
Bertan lanean arituko diren elkarteak bildu dira gaur eraikinaren aurkezpena egiteko.
Gaur lau eragileek egindako aurkezpena. Lau Haizetara Euskaltzaleon Topaguneko, SOS Arrazakeriako, Xenpelar bertso eskolako eta Badalabeko kideak elkartu dira gaur Itziar Ostolaza zinegotziarekin Joxepa Antoni Aranberri Anitzenea eraikinaren aurkezpena egiteko. Datorren ostiralean irekiko dute herritarrak sartu daitezen eta lekua ezagutu dezaten, horretarako, 18:00etan aurkezpena egingo dute.
Eraikina, lehen udal liburutegia zena, orain herriko hizkuntzen eta pertsona anitzen topagune bihurtu nahi dutela azaldu du Ostolazak, eta horrekin, herriaren bizikidetza linguistikoari ekarpena egin nahi diotela. “Herritarrek ikusiko zuten urte luzetan erabilera ezberdinak izan dituen eraikin hau obratan egon dela eta datorren ostiraletik aurrera berrantolaketa bat izango du, funtzio eta helburu berriekin”, esan du zinegotziak.
Gaur bildu diren eragileek hartuko dute parte eraikin berrituan, eta bakoitzak bere espazioa izango du solairu ezberdinetan banatuta. Ostolazak gaineratu du udalarentzat garrantzitsua izan dela eraikina berdefinitzea: “Badalab hona iritsi zenean aukera hori ikusi genuen eta horrela herrian lan egiten duten beste hiru eragilek egoitza berria dute”.
Azkenik, eraikinari izen berria jarri diotela ere azpimarratu du Ostolazak, Joxepa Antoni Aranberri Anitzenea jarri diotela 1865ean jaiotako emakumeagatik. Ehun lantegian egiten zuen lan eta zinegotziak esan du agian ehuntzen eta saretzen lagundu dezakeela horrek ere; hala ere, batez ere euskararekin zuen loturagatik eta bertsolari izateagatik jarri diote izen hori. “Gizarte hartako hainbat tabu hautsi zituen eta gainera haren osaba zenaren izena duen eraikinetik gertu egoteak ere badu xarma hori”, aitortu du Ostolazak.
