Urte berria, kultur agenda berria
Urtarriletik maiatzaren bukaerara arte 54 kultur ekitaldi izango dira herrian. Udalak herritar ororentzat direla azaldu du.
Jesus Mari Martiarena alkatea eta Xanti Val Kultura teknikaria arduratu dira egitaraua aurkezteaz. Lezoko Udalak urtarriletik maiatza bukaerara arteko prestatu duen kultur agendaren berri eman du. Orotara 54 proposamen landu ditu, ia denak Gezala Auditoriumean garatuko direnak. Kalean nahiz Tomas Garbizu Musika Eskolan ere egingo dituzte horiek; azken horretan, Lesoinuren barruko zenbait (martxoaren 17tik 30era egingo dute Lezoko Aste Pedagogiko eta Musikala). “Egitarau zabala eta sakona antolatu du aurten ere udalak. Herriari bizia ematen dioten jarduerak dira eta publiko guztiei zuzenduak, denetarik eta denontzat egongo da”, azaldu du Jesus Mari Martiarena alkateak.
Haur eta helduentzako antzerkia, zinema saioak (Lezoko Zinema Ttikiarenak gehienak), dantza, musika, hitzaldiak, literatur solasaldiak… Denetik da egitarauaren barruan. Udalak eskerrak eman dizkie antolaketan izan direnei (Andreone Udal Liburutegia, Tomas Garbizu Musika Eskola nahiz Kultura Saila), baita agendari ekarpena egin dioten Lezoko Zinema Ttikiari eta Lezo-Jaizkibel Mendi Lasterketari ere.
Xanti Val Kultura teknikariak nabarmendu du ekitaldi gehien-gehienak euskaraz direla. Aldi berean, Lesoinuk herrirako duen garrantziaz ohartarazi du.
Gaur aurkeztu dute egitaraua. Etxez etxe eskuorria banatuko dutela adierazi dute udal ordezkariek. Hala ere, horren bertsio digitala ere eskura daitekeela adierazi dute.
Nabarmentzekoak
Egitarauaren barruan, hainbat ekitaldi nabarmendu dituzte udal agintariek. Adibidez, asteburu honetako bat: Hika Teatroa konpainiak Toto lan berriaren Euskal Herriko estreinaldia Lezon egingo du igandean, 19:30ean Gezalan. Gainera, antzerkiaren atalean, otsailaren 25eko Tuppersex, maiatzaren 7ko El nadador de aguas abiertas, eta maiatzaren 14ko Sexbedinak obrak nabarmendu dituzte.
Musikaren alorrean, Lesoinuz gain, Ilargi Arrizabalagak Beldurrarekin dantzan diskoa herrian aurkeztuko du hilaren 29an (19:30ean Gezalan), eta gauza berbera egingo du Iñaki Labakak otsailaren 4an (19:30), Itzultzeko garaia-ko hamahiru kantuak zabaltzeko. Bi kontzertuak Gezalan dira. Ane Espina lezoarrak eta Garazi Goñik atzeratutako emanaldia otsailaren 11n (12:30) egingo dute Gezalan.
Lezo-Jaizkibel Mendiko Lasterketaren egitarauaren barruan (otsailaren 26an da lasterketa), Alex Txikon kirolari bizkaitarrak hitzaldia emango du otsailaren 23an, Gezalan.
Bestalde, bi dantza emanaldiri sona eman diete udaletik: otsailaren 19ko Los perros-i, eta martxoaren 26ko Abundance-ri. Biak Gezalan dira, 19:30ean.
Gezala Laguna Txartela eta sarrerak
Gezalan izango diren ekitaldi guztietarako sarrerak Lezoko Udalaren webgunean salgai izango dira. Baita Gezala Laguna Txartela ere: 25 euroko kostua du txartel horrek, eta jabeek hainbat deskontu eta abantaila balia ditzakete. Adibidez, Gezalako sarreretan (ohikoak 8 eurokoak dira), hiru euroko deskontuak eskura daitezke.
