Trintxerpeko aparkaleku berria inauguratu dute
Zabalik da Gernika plazaren atzeko parking berria. 198 plaza daude, eta gau nahiz jaiegunetan trintxerpetarrek soilik erabili ahalko dute.
Guztira 198 autorentzako tokia dago aparkaleku berrian. 
Gaur goizean inauguratu dute Trintxerpeko aparkaleku berria Pasaiako alkate Izaskun Gomez, Mugikortasun eta Lurralde Antolaketako diputatu Rafaela Romerok, eta Pasaiako Portuko zuzendari David Candelariok. Parkinga ekitaldia bukatu eta berehala —11:30ean hasi da— irekiko zutela ziurtatu du alkateak.
Ziritza eraikinaren alboko eremuan, Gernika plazaren atzean —Euskadi etorbidearen eta Aduana kalearen artean— 198 autorentzako lekua dago orain, plaza horietatik 6 mugikortasun urriko gidarientzat erreserbatu dituztelarik. Egunean zehar bertan edonork aparkatu ahalko badu ere, lehentasuna trintxerpetarrei emango zaie: haiek soilik aparkatu ahalko dute eremuan asteburu, jaiegun eta astegun gauetan, 19:00etatik 08:00ak arte.
Bertakoak direla ziurtatzeko pegatinak banatu dizkiete udaletik, azken asteotan, ibilgailua Trintxerpen erroldatuta duten bizilagunei. Neurri horrek trintxerpetarrek aparkatzeko dituzten arazoak “arintzeko” balioko duela ziurtatu du gaur goizean Gomezek.
Hiru bat hilabetetan egin dute orubea parking bihurtzeko obra, Mugikortasun eta Lurralde Antolaketako Departamentuak finantzatu duen 773.463 euroko inbertsioari esker. Oraindik aurrera Pasaiako Udala izango da horren mantenu eta kudeaketaren arduradun.
Bi sarbide, oraingoz
Euskadi etorbidetik zein Aduana kaletik du sarbidea gaur-gaurkoz aparkatzeko gune berriak. Biak ala biak mantenduko ote diren galdetuta, baina, zalantzati agertu da alkatea, eta portuko zuzendaria izan da lehen azalpena eman duena. Antza denez, PPAk epe labur-ertainera egiteko asmoa duen obrengatik ezin izango da beti zabalik mantendu Aduana kaleko sarbidea.
Gomezek argitu du, beraz, sarbide nagusia Euskadi etorbidetik atera duten bide berria izango dela, eta horretxegatik duela, hain zuzen, noranzko bikoitza; litekeena delako portuak erabakitzea bere jabetzakoa den Aduana kalea beste ezertarako erabiltzea, eta beraz, sarbide hori ixtea. “Hasiera batean bi sarbide egongo dira; gerora, bakarra”, argitu du pasaitarren eledunak.
Hasierako aurreikuspena behin-behineko aparkaleku hori bost ustez martxan egotea da, Adinberriko behin betiko aparkalekuaren lanak bukatu bitartean. Aurten hasiko dira Trintxerpeko Hospitalillo eremuan Adinberri Ekosistema eraikitzeko obrak.
