'Toto' antzezlanaren Euskal Herriko estreinaldia, Lezon
Hika Teatroa konpainiak erabaki du Lezo izatea euren lan berrienaren estreinaldiaren leku. Igandean da emankizuna, 19:30ean.
Asier Hernandez eta Miren Gojenola aktoreak. Argazkia: HIka Teatro. Hika Teatroa konpainiak Lezoren aldeko apustua egin du. Toto antzezlanaren Euskal Herriko estreinaldia herrian egingo dute. Igandeko 19:30ean, Gezalan, eskainiko dute obra. Oraindik badira sarrerak salgai, Lezoko Udalaren sarreren salmenta zerbitzuan eskura daitezkeenak. Lezoko Udalak urtarriletik ekainera arte landu duen kultur agendaren barrukoa da emanaldia.
Mafalda Bellidoren Chucho antzezlanean dago oinarrituta Toto. Kepa Errastik ekarri zuen gidoia euskarara. Hala, Agurtzane Intxaurragaren zuzendaritzapean garatu dute obra Asier Hernandez eta Miren Gojenola aktoreek. Hika Teatroa konpainia bide luzea egindakoa da, 33 urtekoa da orain arte egin duen ibilbidea. Toto taulara eramango duten bi aktoreek ere eskarmentu handia dute euskal eszenan.
Euskarara itzuli aurretik, hainbat sari eta aipamen jasotakoa da obra. Honakoak, besteak beste:
- Max Sarietako finalista Egile Berri Onenaren atalean, 2019an.
- SGAEko XIII. Autor Express Antzerki sarian, 2018an.
- CLAVE, Valentziako Literatur Kritika Sarian finalista, 2017an.
