Martxan da Landetxeko taberna zerbitzua kontratatzeko prozedura
Prozedura irekia denez, interesdunek haien proiektua hilaren 30era arte aurkez dezakete. Proiektuak bat egin beharko du eraikinaren izaerarekin.
Gaur, ostirala, egin den udalbatzan, Landetxe eraikineko taberna zerbitzua esleitzeko prozedura abiatzea erabaki du Oiartzungo Udalak. Izan ere, erakin horretako egokitze lanak bukatzear daude. Eraikinak giza kohesiorako, euskararen eta kulturaren sustapenerako eta zahartze aktiboaren elkargune izatea du helburu. Hala, orotariko aisialdi ekintzak antolatzeko baliatuko dute udaleko sail desberdinek eta herriko elkarteek.
Guneak taberna izango du ere, eta gaur horren esleipena prozedura irekia bidez egitea erabaki dute. Beraz, interesa duen edonork aurkez dezake bere proiektua. Lokalaren ezaugarriei dagokienean, 173 metro karratu ditu (artean 21 metro karratuko sukaldearekin), terrazaz gain. Aldi berean 102 pertsona sar daitezkeela kalkulatu dute.
Hortaz gain, prozeduran parte hartzeko hainbat baldintza luzatu ditu udalak. Batetik, proposamenek eraikinaren izaerarekin bat egin beharko dute. Alegia, “izaera sortzailea eta komunitarioa indartu eta elikadura osasuntsuarekin eta tokiko eta sasoiko produktuen kontsumoarekin lotutako balioak sustatu beharko ditu”. Bigarrenik, erretiratuek % 20ko beherapena izango dute eskainiko diren otordu eta janari-produktu guztietan. Bukatzeko, gutxieneko ordutegia 09:00etatik 21:00etara izango da astean zehar, eta 10:00etatik 00:00etara asteburuetan. Gainera, taberna irekita egon beharko da Landetxen antolatuko diren ekimenetan zehar.
Urtarrilaren 30a izango da proposamenak bidali eta jasotzeko azken eguna. Kontratua bi urtetarako sinatuko da, eta urte beteko bi luzapen egiteko aukera luzatuko zaio onuradunari. Lehenengo sei hilabeteetan zehar, gutxienez 600 euro ordaindu beharko zaizkio udalari, eta hortik aurrera 1.000 euro hilabetero.
