Lizeoko ikasleak Herbeheretara bueltatuko dira, hiru blogarirekin
Pasaia-Lezo Lizeoko hamazazpigarren ikasle trukea izango da aurtengoa. Estreinakoz eguneroko bat idatziko dute egonaldian zehar hiru ikaslek.
Izaro Muñoz, Dania Valverde eta Jurgi Sarasola, blogariak. 
Asteazken honetan berrartuko dute Pasaia-Lezo Lizeoko batxilergoko lehen mailako ikasleek Herbeheretako tradiziozko ikasle-trukea. Hamazazpigarrena izango da, kontuan hartuta azken bi urtetan ez dela egin, eta 2019koa erdizka eten behar izan zutela. Pasaiako ikastetxeko 18 gaztek Roermond (Limburg, Herbehereak) herrian egonaldia egingo dute astebetez.
Hilaren 25era bitarte, beraz, herbeheretako familia banatan hartuko dute ostatu pasaitarrek, eta Bisschoppelijk College Broekhin ikastetxean arituko dira, hango ikasleekin elkarlanean, ingelesa hobetzen. “Ikasgeletan ikasitakoa praktikan jartzea da eskola truke honen hastapenetako helburua”, azaldu dute arduradunek, “eta baita ikasleei esperientzia berriak bizitzeko aukera eskaintzea ere”. Bi irakasle izango dituzte bidelagun.
Egonaldian zehar agenda estua izango dutela ziurtatu dute Lizeotik: nederlandera ezagutu, izotz patinajea egin, Maastricht eta Amsterdam hiriak ezagutu, Anne Franken etxea bisitatu, eta bidaiari bukaera emateko, kultur festa ospatu. Guzti horren berri emango dute aurten, estreinakoz, blog berri bati esker, Izaro Muñoz, Dania Valverde eta Jurgi Sarasola ikasleek; trukean parte hartzeaz gain, blogari ardura ere hartu dute.
Izarok, Jurgik eta Daniak eguneroko bat idatziko dute hemen klik eginda zabalduko den atarian. “Egunero beren esperientziak idazten saiatuko direla agindu digute”, aurreratu dute Lizeotik. Hiru horiei ere, gainontzeko ikasleei bezala, ikasle-lagun bana izendatu zaie, eta etxean hartuko dituzte martxoan. Orduan egingo dute trukearen buelta, eta herbeheretako ikasleek Pasaia-Lezo Lizeoa izango dute ikastetxe astebetez.
