Euskararen erabileraz gogoeta egiteko, Plaza Hutsa
Lezon herrigintzatik eta politika publikoetatik euskararen erabileran nola eragin hausnartzeko saioa otsailaren 9an egingo dute.
Plaza Hutsa iniziatibaren barruko
saioa egingo dute Lezon. Herriko ezker abertzaleak saioari zein eduki emango dioten aurreratu du: “Lezon herrigintzatik eta politika publikoetatik euskararen erabileran nola eragin hausnartu nahi dugu”. Plaza Hutsa otsailaren 9an izango da (osteguna), 19:30etik 21:00etara, Ibai-Ondon.
Lezoko euskararen erabileraren datuak aztertuko dituzte herritar ororentzat zabalik den batzarrean, eta aurrera begira nola jokatu adosten saiatuko dira. “Lezoko euskararen erabilerarekin kezkatuta bazaude, etorri”, esan dute.
Lezoko datuez gain, nazio mailako testuingurua eman diote herriko Plaza Hutsaren saioari. “Euskal Herrian liberalismo linguistikoaren diskurtso eta praktika asko indartu da azken hamarkadan,. Horren ondorioz, besteak beste, euskararen erabilerak garai zailak bizi ditu. Orain arteko euskararen normalizazio-ereduak goia jo duenaren zantzuak argiak dira. Lezon ere, etorkizuna ez da desberdin ikusten. Euskaraz hitz egitea eta bere alde antolatzea ekintza politiko kontziente izaten jarraitzen du oraindik”, esan dute ezker abertzaleko kideek.
