Luzuriaga diseinatzeko "azken txostena" aurkeztuko du udalak
Aurkezpena otsailaren 6an izango da, Antxoko Kultur Etxean, baina udalaren gonbidapena beharko da bertaratu ahal izateko.
![](https://oarsoaldea.hitza.eus/site/files/2023/01/luzuriaga-antxo.jpg)
Joan den urteko ekainean Pasaiako Udalak Conexiones Improbables aholkularitza enpresa gasteiztarra kontratatu zuen Luzuriagaren etorkizuna diseinatzeko parte hartze prozesua dinamizatzeko. Horrela, udalak bilkuretara gonbidaturiko zenbait eragile antxotarrek hiru bilera egin zituzten dinamizatzaileekin.
Hausnarketa saio horietatik ateratakoa txosten batean bildu zuen Conexiones Improbablesek. Dokumentua udalari aurkeztu, eta aginte organoak erabaki du aurreko prozesuan murgilduta izan zirenekin partekatzea Luzuriaga zer izango den zehaztuko duen “azken txostena”. Udal iturrietatik zehaztu dute, dena den, gonbidapena beharko dela bertaratu ahal izateko.
Bi antxotar talde izan ziren Conexiones Improbablesekin bildu zirenak. Horiei posta elektroniko bidez helduko zaie otsailaren 6ko gonbidapena, bai eta hitzordu zehatza ere.