[Argazki galeria] 23. urtez omendu dute Kontxa Murgia Egaña
Manuel Martinez Murgia Galiziako abertzaletasunaren bultzatzailearen ama izan zen eta 1806an jaio zen Oiartzunen.
23. urtez jarraian omendu dute Kontxa Murgia Egaña oiartzuarra, Manuel Martinez Murgia Galiziako abertzaletasunaren bultzatzailearen ama. Done Eztebe plazan bildu dira Fato Cultural Daniel Castelaoko eta Oiartzungo Udaleko kideak eta omenaldian parte hartu duten herritarrak. Txistulari eta gaiteroen laguntzaz, zimitorio zaharrera abiatu dira, pikondo bat landatzeko. Pikondo hori Rosalia de Castro poeta galiziarraren etxetik hartua da, eta Euskal Herria eta Galiziaren arteko “antzekotasun eta lokera” izan nahi duela adierazi du Josune Cousillas Kultura zinegotziak.
Pikondo hori landatuta, bibliotekara joan dira Murgiaren oroimen ekitaldiarekin jarraitzeko, egungo biblioteka baita Kontxa Murgia zenaren jaiotetxea. Bertan lore sorta eskaini diote Murgiari, bere oroimenean jarri zuten plakaren alboan. Honakoa dio plakak: Etxe honetan jaio zen Kontxa Murgia Egaña, Galiziako abertzaletasunaren aitzindari izango zen Manuel Martinez Murgiaren ama. Lore sorta eskainita, ekitaldi bat egin dute bibliotekan bertan Murgiaren figura oroitzeko.
Josune Cousillasek bere bizitzaren ibilbidea azaldu du lehenik. Kontxa 1806ko urtarrilaren 29an jaio zen Oiartzunen eta 1854ko uztailaren 13an hil zen Santiago de Compostelan, 48 urte zituela. Kontxaren aitak, Domingo Murgiak, Oiartzungo San Esteban elizako organo postua lortu zuen 1797an, eta etxea eta baratza eman zizkioten gaur egungo bibliotekan. Bederatzi urte geroago, bertan jaio zen Kontxa.
Bederatzi urte zituela, Tolosara lekualdatu ziren, eta bertan, bere aita alderdi liberalean erroldatu zen. Urte batzuk geroago, Galiziara egin behar izan zuten ihes. Gurasoak Gipuzkoara itzuli ziren, baina Kontxa Galizian geratu zen. Galizian Jose Martinezekin ezkondu zen eta bi seme izan zituzten. Semeetako bat, Manuel Martinez Murgia, Galiziar berpizkundeko pertsonaia handienetako bat izan zen, eta Rosalia de Castrorekin ezkondu zen.
Murgiaren bizitzaren nondik-norakoak aipatuta, Anxo Angueira galiziarrak hartu du hitza. Rosalia de Castro Fundazioko lehendakaria da, eta Oiartzunen egotearen ohoreaz eta garrantziaz mintzatu da galizieraz. Oso eskertua azaldu da Murgiaren figura oroitzeko Oiartzungo Udalak urtero egiten duen errekonozimenduagatik.
Atzoko poesia emanaldian, gainera, Rosalia de Castroren poema batzuk errezitatu zituzten Antton Kazabonek, Anxo Angueirak eta Xose Estevezek.
Hona hemen omenaldian eman dituen hainbat argazki:
