Joana Mendiboure, EH Bilduk proposatutako alkategaia
Koalizio abertzaleko mahai politikoaren proposamena da Mendiboure. Bihar arte zabalik dago hautagai gehiago aurkezteko epea.
Oiartzungo EH Bilduren mahai politikoak Joana Mendiboure Garaiar proposatu du maiatzaren 28ko udal hauteskundeetan alkategai izateko. “Oiartzun hobea eraikitzeko herrigintzan esparru ezberdinetan egindako lanagatik eta arlo profesionalean duen eskarmentuagatik azken urteetan EH Bilduk udalean egin duen lanari jarraipena emateko zerrendaburu ezin hobea” dela baietsi du koalizio abertzaleak Mendiboureren izena alkategai bezala proposatzeko.
Alderdiak jakinarazi du Mendiboureren hautagaitza babestu duten Oiartzungo EH Bilduren komunitateko hamabost kideen artean daudela Jexux Leonet egungo alkatea, Eneritz Arbelaitz alkateordea, Agustin Lekuona eta Olaia Lasa zinegotziak edota Aiora Perez de San Roman alkate ohia.
Mendibourek 46 urte ditu eta Ugaldetxon bizi da. Baionan Euskal Ikasketak eta Humanitateak ikasi zituen, eta, Eskoriatzan berriz, enpresa ikasketak. Orain artean, bere lan esparruak euskalgintza, kultura, komunikazioa eta kudeaketa izan direla adierazi du koalizioak. Besteak beste, Udako Euskal Unibertsitateko prentsa bulegoan, Elhuyar aldizkarian eta Bertsozale Elkartean egin du lan oiartzuarrak. 2006an, gainera, bere komunikazio enpresa sortu zuen Oiartzunen. Egun, Orioko Herri Ikastolako zuzendaritzako kide eta irakasle da.
Ibilbide profesionalaz gain, herrigintzan bide luzea egindakoa dela baieztatu du koalizioak: elikadura burujabetzan eta feminismoan bereziki. Oiartzungo Feministen Asanbladak antolatutako Ekonomia Feministako tailerrean ere parte hartu zuen Oiartzun eta inguruetako beste emakumeekin batera.
Hautagaitza berresteko prozesua
Mahai politikoaren proposamenaz gain, bihar arte zabalik dago hautagaiak aurkezteko epea. Otsailaren 2tik 4ra, aldiz, EH Bilduko militanteek proposamenen artean bozkatu edo Joana Mendiboure Garaiarren hautagaitza berresteko aukera izango dute.
