Satrustegiren lurrak herriarentzat nahi dituztela errepikatu dute
Ostegun iluntzean elkarretaratzea eta hitzaldia antolatu zituen Amezti Basoak Bizirik Jaizkibel taldeak, Lezon.
Osteguneko elkarretaratzeko argazkia, Lezoko udaletxearen atarian. 
Joan den ostegun iluntzean, Amezti Basoak Bizirik Jaizkibel taldeak abiarazitako Baso Bizien Asteko egitarauaren magalpean, elkarretaratzea egin zuten zenbait herritarrek Lezoko udaletxearen aurrean, Satrustegiren lurrak herriarentzat nahi dituztela aldarrikatzeko asmoz. Kale agerraldiaren ondoren hitzaldia zuten antolatuta, gaian sakontzeko.
Kultura Aretoan eskaini zuen hitzaldia Iñaki Aizpuru Oiarbidek, Itsasondoko alkatea, Naturkoneko kidea, eta ingurumen gestioko arduretan eskarmentu handikoa. Jaizkibel mendiaren baso eta ekosistema naturalaren egoera larriak kezkatuta, hogei lagun inguru bertaratu ziren mintzaldia entzutera.
Zentzu horretan, pankarta bidez kalera atera zuen Ameztik Etxetxo Lezoko Memoria Historikoa taldearekin batera udalari egin berri dioten eskaera: Satrustegiren lurrak herri erabilerarako desjabetu ditzala. Auziaren gaineko informazio zehatza erreportaje honetan irakur daiteke.
