"Ikasleon beharrak bestelako irakurketekin ez lotzea eskatzen dugu"
Ikasteko baldintza egokiak dituen ikasgela bat, zehazki, nahi dute eskura asteburuetan azterketa garaian ikasle horiek. Baina eskaera horretatik abiatuta, "bestelako irakurketekin nahastu" duela herriko alderdi politiko batek ikasleena salatu dute, baita hainbat komunikabideek modu "ez egokian" landu dutela.
Lekuona fabrikako isiltasun gela artxiboko irudi batean. Kezka zabaldu da Errenteria-Oreretako ikasle talde baten artean. Duela hilabete batzuk eskaera zehatza egin zioten Errenteriako Udalari: azterketa garaian, asteburuetan ere zabalik egongo den eta ikasteko baldintza egokiak beteko dituen ikasgela bat izatea. Eskaera horren inguruan, babesa lortu nahian, sinadura bilketa abiatu zuten, gainera.
Eskaera horrekin udalera jo zutela zuzenean, ez zutela komunikabidetara jo azaldu dute, “gaia lantzeko modu egokiena iruditu zitzaigulako”. Hala ere, gaia hainbat komunikabidera heldu eta modu “ez egokian” landu izanak egonezina piztu du ikasle horien artean, “baita herriko alderdi politiko batek gure eskaera aitzakia hartuta kanpaina egiteak”, erantsi dute. Udalarekin harreman zuzenaren bidez landu nahi zuten eskaerak, beraz, beste dimentsio bat hartu du azkenean eta horren harira, prentsa oharra bideratu dute komunikabideetara orain, argi jartzeko zein izan den udalerriko ikasle horien eskaera zehatza.
Ikasteko baldintza egokiak dituen espazioa, ikasgela bat, zehazki, nahi dute eskura asteburuetan azterketa garaian ikasle horiek. Baina eskaera horretatik abiatuta, “bestelako irakurketekin nahastu” duela herriko alderdi politiko batek ikasleena salatu dute: “Gure eskaerarekin bat egin nahi duen orok ateak zabalik izango ditu, baina ikasleon beharrak bestelako irakurketekin ez lotzea eskatzen dugu, ez baitute inolako loturarik gure aldarrikapenekin, eta dena multzo berean sartzea, gutxienez, nahasgarria iruditzen zaigu, are gehiago, hauteskundeak ate joka ditugunean”.
Izan ere, ikasgela egokiaren eskaera, Lekuona Fabrikaren programazioarekin lotu duenik bada, “guk ez dugunean halako inolako balorazio edo eskaerarik egin” nabarmendu dute ikasleek. Egonezina ere, eskaera egin duten ikasleak Errenteria-Oreretako ikastetxe zehatz batekin lotu dituelako komunikabide batek. Argi diote, iniziatiba herriko ikasleena dela, ez ikastetxe jakin batekoena: “Unibertsitateko eta batxilergoko ikasleak gara, batez ere, eta tartean izango dira aipatu ikastetxekoak ere, baina ez haiek bakarrik, ezta haiek nagusiki ere”.
Ikasleen eskaera medioetan aurkitu izana “kasuala” ez den susmoa ere azaldu dute, “maiatzean udal hauteskundeak izanda”. Ezinbestekoa jo dute prentsa oharra medioetara zabaltzea orain, baita udalari, zuzenean, egindako eskaera idatzia helaraztea (hemen klik eginda irakur daiteke) “herritarrek informazio zuzena izan dezaten, eta ez hirugarren batzuen bidez eta itxura batean, asmo ez oso zintzoarekin filtratutako sasi informazioa”.
Informazio horrekin lotuta, gaur bertan jakinarazi du udalak Lekuona Fabrikan ikasgela zabalduko duela maiatza eta uztaila artean ikasleei begira.
