Bihar hasiko da Jostakeitan
Biharkoaz gain, hilaren 17 eta 31n, nahiz ekainaren 7an bilduko dira familiak euskarazko aisiaz gozatzeko, Goiko Plazan.
Iazko saio baten irudia. Bihar, asteazkenarekin, hasiko dira aurtengo Jostakeitan egitasmoaren barruko saioak. Asmoa, haur eta familiek jolasean gozatzea da, euskaraz eta kalean. Beraz, bihar, hilaren 17 eta 31n, nahiz ekainaren 7an egingo diren saioak Goiko Plazan egingo dituzte. Eguraldi txarrarekin, Lezo Herri Eskolako patio estalian bilduko dira.
Adin tarteka banatu dute aisia euskaraz gozatzeko iniziatiba. Hala, asteazken horietako 17:00etan bilduko dira Zotz taldekoak, hau da, 3-5 adin tartean dauden haurrak eta haien senitartekoak. Ondoren, 18:00etan, Potz taldekoen txanda: 6-9 adin tartekoen eta haien ahaideen txanda izango da.
Euskara Talaia, Txirbilla Aisia Taldea, Lezo Herri Eskola, Hezikuntza Guraso Elkartea, eta Lezoko Udala dira egitasmoaren bultzatzaileak. Hala, Euskara Talaiak ikasturtean zehar egiten dituen jardueren jarraipena da Jostakeitan, kurtsoaren bukaera aldera egin ohi dena. Txirbillakoek dinamizatuko dituzte saioak.
