Portuak 7.200 m2ko lurzatia ustiatzeko lizitazioa atera du
Gaituko duten espazioak salgai trafiko berriak sortzeko balioko duela espero du PPAk. 10etik 30 urtera arteko esleipena izango da.
7.200dik gora metro koadro ditu Buenavistako lursailak. 
Pasaiako Portu Agintaritzak (PPA) martxoko Administrazio Kontseiluan onartu zuen Buenavistako kaian dagoen lursaila, guztira 7.246,71 metro koadro dituena, gaitu eta ustiatzeko lehiaketa irekitzea.
Eremua portu zerbitzuak eskaini eta salgaiak manipulatzeko erabiliko da. Agintaritzak espero du portuan salgai trafiko berriak sortzeko balioko duela espazioa gaitzeak, eta baita edukiontzi gehiagori sarrera emateko ere.
Emakida gutxienez 10 urterako esleituko zaio dagokion enpresari, eta 30 urtera arte luzatu ahal izango da kontratua. Hori lortzeko, eskatzaileek uztailaren 7ra arteko epea izanen dute euren eskaintzak aurkezteko. Oinarriei eta baldintzei dagozkien pleguak, bai eta beharrezko dokumentazio osagarria ere, portuaren webgunean topa daitezke.
