Euskal mitologia izango da igandeko Lizeo Eguneko gaia
Ikastetxeak urteroko jaiaren egitarauaren berri eman du. Iaz bezala, aurten ere eraikin nagusian bertan izango dira emanaldiak.
Iazko 'Lizeo Astea'. LH 6ko ikasleen emanaldia, goiko pistan. 
Datorren igandean, hilak 21, urteko egun handia ospatuko dute Pasaia-Lezo Lizeoan: 2023ko Lizeo Eguna. Aurtengo gai nagusia Euskal Mitologia izango da, eta iazko ereduari jarraiki, ikastetxeko eraikin nagusiak hartuko du jaia —lehen udal kiroldegian izaten baitziren emanaldiak–.
Ohi bezala, HHko, LH2ko, LH4ko LH6ko eta DBHko ikasleek interpretatuko dituzte Gotzon Poza koreografoak sortutako dantzak. Ikuskizunak ikastolako leku desberdinetan izango direnez, behin baino gehiagotan errepikatuko dituzte, ikusle guztien gozamenerako. Hauek izango dira dantza guneak: idazkaritzako pasilloa, goiko pista eta beheko pista.
Lizeo Egunaren bigarren ardatza omenaldiak izan ohi dira, eta aurten ere egingo dituzte horiek. Lehenik, Pasaia-Lezo Lizeoan aurten euren ibilbidea bukatuko duten Batxilergoko 2. mailako ikasleak omenduko dituzte. Bestetik, 1987ko promozioko ikasleei egingo diete harrera. Eta, azkenik, ikasturte honetan erretiroa hartuko duten langileen bidea goraipatuko dute.
Eguna bukatzeko, jana, edaria, musika eta beste hainbat ekintzaz gozatzeko aukera izango dute gerturatzen direnek, DBH4ko ikasleek eta euren gurasoek antolatuta. Horratx, eguneko egitaraua:
- 11:00. Dantzak. Ikasleen emanaldiak hiru leku desberdinetan (ikusleak batetik bestera ibiliko dira ikuskizun osoaz gozatzeko).
- 12:00. Omenaldiak. Batxiler 2ko ikasleei, 1987ko promozioko ikasleei eta ikasturte honetan jubilatuko diren langileei aintzatespena egingo diete beheko pistan.
- 12:30-16:30. Janaria, musika eta ekintzak. Taberna, bokatak, musika eta jolasak. DBH4ko ikasleek antolatutakoak dira horiek, eta ekarpena ikasturte bukaerako bidaiarako erabiliko dute.
