Kanpaina antxotarrekin abiatu du EH Bilduk
Egoitzatik abiatuz, bost geldialdi egin zituen ostiraleko mintzaldi ibiltariak. Zerrendakide nahiz Antxoko militanteek hartu zuten hitza.
Azken geldialdia, Luzuriagan. [Argazkia: Pasaiako EH Bildu]. 
Ostiral arratsaldean Antxoko kaleetan zehar egindako lehen kanpaina ekitaldiaren berri eman du Pasaiako EH Bilduk. Barrutiko bost gune estrategikoetan geldialdiak eginez alderdiaren alkategai ohi Junkal Mintegiak, eta egungo zerrendaburu Teo Alberrok ziurtatu zuten koalizio abertzalearen eredua “alternatiba bakarra” dela.
Hurrenez hurren, honako tokietan egin zuten geldialdia: Adifen tren geltokian, Topoaren arkupeetan, Gure Zumardian, Luzuriaga inguruan eta Biteri plazan. Aitor Brion hautagaia izan zen hitza hartzen lehena, eta jarraian mintzatu zen Iraitz Pazos. Lehenak iritzi zion “lan fina” egin duela alderdiak azken legegintzaldian, udal gobernuak ez bezala. “Nire bizkarretan duzue PSE-EEren kudeaketa traketsaren adibide den Renfeko estazioa”, mintzatu zen Pazos, “bete gabeko beste promesa baten aurrean gaude”.
Topoaren arkupeen azpian eta plaza nagusian Ane Etxeberriak eta Laura Rek hartu zuten hitza. Etxeberria herrian espazio duinak bermatzearen alde mintzatu zen, elkarlanetik: “EH Bildu entzuteko prest dator”. Zerrendan laugarren denak ziurtatu zuen EH Bildu “gertuko politika, herritik, herriarekin eta herriarentzat” egitera doala, “herritarrak eta eragileak lehen unetik kontutan hartuko dituena”.
Luzuriagan Udane Migeltorena eta Mikel Garciak hitz egin zuten. Lehenak Osakidetza eta zaintza izan zituen hizpide, Antxoko anbulatorioaren adibidetik abiatuz. “Arduragabe jokatu dute [gobernuko alderdiek], antxotarrok behin behin-behinekotasunera kondenatuz”. Garcia Luzuriagaz mintzatu zen, EH Bilduk Madrilen lortutako 6 milioi euroko akordioa goraipatuz.
Hitza hartzen azkenak zerrendako ohorezko postuan eta buruan diren Mintegia eta Alberro izan ziren. “Udala herritarren eskura jarriko dugu, gure herriari eta herritarrei denbora eta ahalegina eskainiko dizkiegu. Horretara etorri gara, gu herria garelako. Horregatik, datorren maiatzaren 28an EH Bildu bozkatzeko eskatu nahi dizuet, ez baitago beste aukerarik herri honek behar duen jauzia emateko”, bukatu zuen alkategaiak.
