Gaztañoko jaietako larunbateko egitaraua, ez da jada sekretua
Kros herrikoia, kontzertuak eta DJ Bullen musikak girotuko du larunbata. Mozorro afaria ere egun horretan egingo dute.
DJ Bull ohikoa da jada Gaztañoko jai egitarauaren barruan. Apur bat gehiago zabaldu du leihoa Gaztañoko Auzo Elkarteak, eta oraingoan ekainaren 17ko egitarauaren berri zabaldu du. Gutxika ari da errepublika independentea jai egitarauaren berri ematen emozioa mantendu nahian.
Goizetik goizaldera arte zer gozatu izango da auzoan, eta bertaratzen direnek ez dute damurik izango. Kirola eginez esnatuko dira, dagoeneko sobera ezaguna den Kros Herrikoiarekin. XX. ekitaldia izango du dagoeneko aurtengoa. Txikienen txanda helduko da ondoren. Sariak banatuta pintxo potea egingo dute.
Arratsaldean, berriz, mus txapelketa, haur jolasak eta mozorro afariaren txanda izango da. Afariaren gaia, jaien bera izango da, eta hortaz Palestinarekin zerikusia duten mozorroak aukeratu beharko dituzte afarira bertaratzen direnek. Gauean, berriz, musika eskaintza oparoa, gustu guztietarako. Erromeri giroarekin hasita, kontzertuak hartuko du txanda ondoren Gaztetxean: Ibil Bedi eta Astoratuak taldeak ariko dira.
Gau txorientzat, berriz, DJ Bullek girotuko du gaua ordu txikiak arte. Goizaldean, gainera, sorginen edabe magikoa banatuko dute indarrak berreskuratzeko.
Egitaraua
Ekainak 17, larunbata
- 10:30: Gaztañoko XX. Kros Herrikoia. Ondoren, Haur Krossa.
- Sariak banatu ondoren pintxo potea.
- 16:00: Mus Txapleketa Bukagaitz elkartean.
- 17:00: Haur Jolasak, Gaztetxean.
- 21:00: Mozorro afaria, aurtengo gaia Palestina.
- Afalostean Erromeria giro bikaina trikitilariekin.
- 23:00: Ibil Bedi eta Astoratuak taldeekin kontzertua Gaztetxean.
- 01:00: DJ Bull.
- Goizaldean: Sorginen edabe magikoa indarrak berreskuratzeko.
