Altzateko babes ofizialeko etxebizitzak eskuratu ahal izateko prozesua hasi da
Horiek eskuratu ahal izateko izen emate epea ekainaren 15era arte izango da zabalik. 16 etxebizitza dira, 187.000 eta 194.000 euro artekoak.
Lezoko Udalak jakinarazi du Gipuzkoako Aldizkari Ofizialean jada argitaratu dela Altzateko Lezoko eremuan eraikitzekoa den babes ofizialeko eraikinean etxebizitzaren bat eskuratzeko baldintzen zerrenda. Aldi berean, zozketarako (beharrezkoa balitz) izen emate epea ere zabalik dela jakinarazi du, ekainaren 15era arte. Orotara, Lezoko lur zatian babes ofizialeko hamasei etxebizitza egingo dituzte, dorre berberean denak. Horien prezioa 186.949 eta 193.102 euro artekoa da, etxebizitza bakoitzaren ezaugarrien arabera.
Eskaera egiteko bi bide daude:
- Telematikoa: udalaren webgunearen bitartez.
- Aurrez aurrekoa: Herritarrentzako Arreta Zerbitzuan (Gurutze Santuaren plaza, 1), astelehenetik ostiralera, 08:30etik 13:30era. Telefono zenbakia: 943 52 46 50.
Etxebizitzak eskuratu nahi dituztenek, euren eskaeretan hainbat agiri aurkeztu behar dituzte, tartean honakoak:
- Urteko 12.000 eurotik 39.000ra bitarteko diru sarrera justifikatu behar da. Horretarako 2021eko errenta aitorpena aurkeztuaz (ez da onartuko 2022koa). Aitorpena egitera behartuta ez daudenek, Foru Ogasunak emandako salbuespen ziurtagiria aurkeztu beharko dute.
- Eskatzaileek Oarsoaldeko udalek emandako errolda ziurtagiria aurkeztu behar dute. Lezon erroldaturik daudenek ez dute ziurtagiririk aurkeztu beharko.
Etxebizitzen informazioa
Babes ofizialeko 16 etxebizitza horiek honako ezaugarriak dituzte:
- Etxebizitza bat dibertsitate funtzionala duten pertsonentzat izango da, bi logelakoa, trasteleku eta garajearekin.
- Bi etxebizitza, familia guraso bakarreko ama edo aitentzat izango dira, 18 urtez azpiko adingabea euren kargura dutenak. Hiru logelakoak dira horiek, trasteleku eta garajearekin.
- Bi etxebizitza 18-35 adin tartekoentzat gordeko dira, hiru logela, trastelekua eta garajea dituzte.
- Gainontzeko 11 etxebizitzak kupo orokorrerako izango dira: hiru logela, trastelekua eta garajea dituzte.
Goiko loturan sartuz gero, baldintza xeheagoak ikus daitezke, tartean, prozesurako onartuak diren izan direnen zerrenda noiz izango den ikusgai.
