Zerbitzu publiko "indartsuak" aldarrikatu ditu EH Bilduk
Pasaiako alkategai Teo Alberro eta Esti Elduaien Gipuzkoako Batzar Nagusietarako hautagaia zerbitzu publikoak sendotzeko beharraz aritu dira.
Haritz Perez, Esti Elduaien, Itziar Ostolaza, Teo Alberro eta Iraitz Pazos. 
EH Bilduk zerbitzu publikoak sendotzeko konpromisoa berretsi du gaur Pasaian egindako agerraldian. Teo Alberro Pasaiako alkategaiak eta Esti Elduaien Gipuzkoako Batzar Nagusietarako hautagaiak koalizio abertzaleak alor horretan egin asmo dituenak azaldu dituzte.
Trintxerpetarrak herritarren beharrizanak hobeto asetzeko “zerbitzu publiko sendoak” premiazkoak direla adierazi du, zerbitzu publikoen bidez komunitatea zaindu eta “herri bat duintzen” baita. Kalitate hori hezkuntza eta osasungintza bezalako arlo estrategikoetatik hasi eta udalek eskaintzen dituzten zerbitzu txikienetara arte luzatu behar dela sinetsita agertu da.
“Gure herrian urteak daramatzagu ikusten nola murrizten dizkiguten zerbitzuak eta nola kentzen dizkiguten gero eta espezialitate gehiago gure anbulatorioetan“, Alberrok. Adibideak eman ditu: pediatria zerbitzua kendu zuten Donibane, eta traumatologia Trintxerpe-San Pedroko osasun etxean. “Ahaztu gabe Pasai Antxoko anbulatorioak hamarkada bat baino gehiago daramala barrakoietan, Eusko Jaurlaritzaren inbertsioaren zain”.
Koalizio abertzaleak gaitzetsi du udal gobernuak promesturiko Antxoko adinekoen egoitza berria “une honetan hasiera datarik eta amaiera datarik gabeko egoitzaren publizitate panela” besterik ez dela. Pasaia da udalerritik kanpo adineko pertsona gehien dituen herria, Aldundiaren azken datuen arabera, eta uste dute ez dela kasualitatea datu hori: “Egoitzetan dauden Pasaiako egoiliarren ia %80 senideengandik eta ingurukoengandik urrun egotera behartuta daude, Pasaian plazarik ez dutelako”.
